တောရိပ် မှောင်ရီစ
မာရသွန် တိမ်နီတွေ
ငှက်တအုပ်ကို ပွေ့ချီလို့...။
ခြေသွားလမ်းတလျှောက်
ဆူးရစ်ကောက်တွေက
မို့မောက်တဲ့ ဒေါသတွေနဲ့ ...။
အမှောင်
တောင်ယာတဲထဲ
ပုန်းခိုမယ့်ဆဲဆဲ ...။
လောကငဲ့...
အလင်းခပ်များများ
ပေးသွားပါဦးကွယ့်
လောဘနည်းတဲ့
ဟော့ဒီ
တောင်ယာတဲကလေးဆီ။
လောကရဲ့
လှည့်စားမှု အတွန့်အခေါက်တွေထဲ
မှောက်လျက်လဲတဲ့အခါ
တောင်ယာတဲလေ
နွေဆို ရေ
မိုးဆို ထီး
ဆောင်းဆို မီး
ဖြည့်ဆည်းနိုင်ခဲ့လေရဲ့...။
မဆုံးသေးတဲ့
ညတွေ...
ပြီးတော့ -
ရောက်လာမယ့်
မဖြစ်မြောက်သေးတဲ့ နေ့တရက်
ဒါဟာ ၀ိုင်တခွက်ဆိုရင်
တရှိုက်မက်မက် သောက်သုံးဖို့
တောင်ယာတဲဆိုတာ လိုအပ်တယ်။
လောကရေ ...
တို့တတွေ ရပ်နားတဲ့
ပြီးရင် ဖြတ်သွားမယ့်
ဟော့ဒီ တောင်ယာတဲကလေးဆီ
နေ မဝေးမီ
အလင်းခပ်များများ
ပေးသွားပါဦးကွယ့်။
ATN
သေနတ်တလက်ကို လွယ်ပိုးရင်း
ဆင်းတက်ခဲ့ဖူးတဲ့ တောင်ကြောပေါ်က
တောင်ယာတဲလေးတခုသို့ အမှတ်တရ
၁၉၉၆ နိုဝင်ဘာလထုတ် ဒေါင်းအိုးဝေ အတွဲ ၁ အမှတ် ၁ မှာ ဖော်ပြခဲ့တဲ့ ကဗျာပါ။
No comments:
Post a Comment