Nov 6, 2011

ကစဥ့်ကလျား ပြန့်ကျဲနေသော မေပဲလ်ရွက်များ

by Augustine Nge on Sunday, November 6, 2011 at 1:33am













သည်နေ့မနက်ကတော့ နေသာနေသည်။ သို့သော်လည်း ဆောင်းဦးပေါက်၏ မြောက်ပြန်လေက အေးစက်လွန်းနေသော ဓါးသွားပမာ စူးစူးရှရှ... ။ ဓါးနှင့် ထိုးအခွဲခံလိုက်ရသလို လေအဝှေ့မှာ တိုးရှဲလွင့်ကျဲသွားသော မေပဲလ်ရွက်များမှာ မျက်စေ့တဆုံး...။ အရောင်ပြောင်းပြီးစ အရွက်များမှာ ညိုစိမ်းနီဝါ... ။ လောက မာယာကို အဖျားအနားလေး တစုံမျှ တွေ့ထိလိုက်မိသလိုမျိုး လေထဲမှာ ဝေ့၀ဲပြေးသွားသော မေပဲလ်ရွက်များ.... ။

လောကကို တစုံတရာမျှ တုန့်ပြန်မပြောဆိုနိုင်သော အကြည့်မျိုးနှင့်... လေအဝှေ့မှာ လွင့်စင် ကျိုးကျဲသွားနေသော မေပဲလ်ရွက်များကို သူကြည့်နေမိသည်။ သူသည်ပင် သက်ရှိ မေပဲလ်ရွက် တရွက်လေလား... ။

သူ စီးနင်းရမည့် ဘတ်စ်ကား လာနေပါပြီ... ။ ရှစ်ဆယ့်တစ် ဒေါ်လာပေးရသော တလတာ ဘတ်စ်ကားစီးနင်းခွင့် လက်မှတ်ကို လက်ထဲမှာ အသင့် ကိုင်ဆောင်ထားလိုက်သည်...။ (သူ့ရှေ့မှာ ထိုးရပ်လာသော ဘတ်စ်ကားကို နိဗ္ဗာန်ယာဉ်အလား ပျော်ရွှင်စွာ သူ တက်ရောက် စီးနင်းလိုက်မည်ဟု မထင်ကြပါနှင့်...။)

အဆင်းအတက်များသော မှတ်တိုင်ဖြစ်သည်နှင့် အညီ လူ ဆယ့်လေး-ငါးယောက်လောက် ဆင်းပြီးမှ ဘတ်စ်ကားပေါ်သို့ သူ တက်ခွင့်ရသည်...။ ကောင်းသော မနက်ခင်းပါ-ဆိုသော သူ့ ၀တ်ကျေတမ်းကျေ နှုတ်ဆက်စကားကို တလတာ ဘတ်စ်ကားစီးခွင့် လက်မှတ်ကို ထောင်ပြရင်း ဘတ်စ်ကား ဒရိုင်ဘာကို သူ ပြောလိုက်သည်။ အပြန်အလှန်အားဖြင့် ဘတ်စ်ကား ဒရိုင်ဘာကလည်း - ကျေးဇူးပါ... ခင်ဗျားလည်း ထို့အတူ ရှိပါစေ-ဟု ပြန်ပြောသည်... ။

ထိုနေ့မှာ လောကကြီးသည် ၀တ်ကျေတမ်းကျေအားဖြင့် အပြန်အလှန် လှပနေသည်ဟု သူ မဲ့ပြုံး ပြုံးမိလေသည်။

နီးရာ ခုံတခုမှာ ၀င်ထိုင်ရင်း... သူ့ အိုင်ဖုန်းကို ဆွဲထုတ်ယူလိုက်သည်...။

Slide to unlock... ဟူသော ပြေးလွှားနေသော စကားစုလေးတစုကို သူ မြင်လိုက်သည်... ။

---------------------------------------------------------------------------------

အိမ်-ဟူသော စကားလုံးကို တွေ့တိုင်း သူ့ ရင်မှာ မုန်တိုင်းထန်သည်... ။

အိမ်တအိမ်မှာ သူနေခဲ့ဖူးသည်။ ထိုအိမ်မှာ သူပျော်ခဲ့ဖူးသည်။ သို့သော်လည်း ထို အိမ်မှာ သူ ကြာမြင့်စွာ မနေခဲ့ရပါ။ ထိုအိမ်သည်... အမေ့အိမ် မဟုတ်ပါ။ အဖွား၏ အိမ်ဖြစ်သည်။ အဖိုး၏ အိမ်ဖြစ်သည်။ အဖိုးနှင့် အဖွား၏ အိမ်မှာ သူ ပျော်ရွှင်ခဲ့ဖူးပါသည်။

ထို့နောက် နောက်ထပ် အိမ် တအိမ်မှာ သူနေခဲ့ရသည်။ ထိုအိမ်သည် အမေ့အိမ်လား... အဖေ့အိမ်လား... မည်သူ့အိမ်လဲ... သူ မစဉ်းစားရဲပါ...။ ထိုအိမ်ကို အမေ ပိုင်သည်လား...။ အဖေ ပိုင်သည်လား...။ မည်သူ ပိုင်သည်ဖြစ်စေ... နုနယ်သော ကလေးတယောက်၏ ဦးနှောက်ကို အဆိပ်တက်စေခဲ့သော ထိုအိမ်မှာ မည်သည့်အခါကမျှ သူ မပျော်ရွှင်ခဲ့ဖူးပါ။

-------------------------------------------------------------------------------

သေနတ် တလက်ကို သူ တကယ် ကိုင်တွယ် ပစ်ခတ်ခွင့်ရချိန်မှာ သေခြင်းတရား အကြောင်းကို ကောင်းကောင်း သိခဲ့လေသည်...။ သေခြင်းတရားသည် မိမိတို့ အနီး အနားမှာ အချိန်မရွေး... ။ သေချင်တိုင်း သေ၍ မရ...။ မသေချင်လည်း သေမည်။ သေချင်သော်လည်း မသေ။

သေခြင်းတရားသည်... ချစ်ခြင်းမေတ္တာလို ဆန်းကျယ်လေသည်...။

သေမှာ ကြောက်သူများ မသေကြသေး...။ သေမှာ မကြောက်သူများ တယောက်ပြီးတယောက် သေနေရလေသည်။

-------------------------------------------------------------------------------

ဘတ်စ်ကားပေါ်မှ သူဆင်းလိုက်ချိ်န်မှာ အိုင်ဖုန်းကို သူဖွင့်ကြည့်လိုက်မိတော့ ည ၈ နာရီ ၃၄ မိနစ် ရှိနေပြီ... ။

သူ မနက်က အလုပ်သွားချိန်မှာ ဝေ့၀ဲ လွင့် ပျံသွားနေသောမေပဲလ်ရွက်များသည်လည်း အော်ရီဂွန်၏ ဆောင်းဦး မိုးရေစက်များကြားမှာ ကတ္တရာလမ်းနှင့် အနမ်းများချွေနေကြပုံပင်... ။ အနက်ရောင် ကတ္တရာလမ်းပေါ်မှာ ပြားချပ်နေသော မေပဲလ်ရွက်များကို သူကပဲ သနားနေမိသေးတော့သည်... ။

--------------------------------------------------------------------------------

သို့သော်လည်း မေပဲလ်ရွက်တွေ တနှစ်တခါ အရောင်ပြောင်းကြတာကို သူက သတိရမိသွားသေးသည်။

-------------------------------------------------------------------------------

သူသည် မေပဲလ်တရွက် မဟုတ်တာ သေချာသည်။
သူသည် ကစဥ့်ကလျား မည်သည့် အခါအမျှ ပြန့်ကျဲနေမည် မဟုတ်။

သို့သော်လည်း... သူသည်... ........... ......................

atn

Oct 27, 2011

၂၃ နှစ်တာ မှန်ကူကွက်များ...











၂၃ နှစ်တာ မှန်ကူကွက်များ...

သည်နေ့ အလုပ်နားရက်ဆိုတော့ မနက်စောစောမထပဲ အားရပါးရအိပ်လိုက်ဦးမည်-ဟု အားခဲထားသမျှ ဧည့်ခန်းထဲမှ နှိုးစက်သံကြောင့် သူ နိုးသွားသည်။ မနေ့ညက နှိုးစက်ကို ပိတ်ထားဖို့ မေ့သွားသည်ပဲ။ နှိုးစက်ကို သွားပိတ်ဖို့ အိပ်ယာထဲမှ လူးလဲထလိုက်ရင်း ညက မပိတ်ပဲ ထားခဲ့သော မျက်နှာစာအုပ် စာမျက်နှာကို အိပ်ချင်မူးတူး မျက်လုံးများက ရောက်သွားသေးသည်။ ဧည့်ခန်းထဲ သူရောက်သည်အထိ နှိုးစက်ကြီးက အော်နေဆဲ။ နှိုးစက်ကို ပိတ်ပြီး မျက်နှာသစ်ဖို့ ရေချိုးခန်းဆီ လှည့်အလာမှာ... ဂွဒ်မောနင်း ပါပါး..-ဆိုသော သားကြီး၏ နှုတ်ဆက်သံကို ကြားလိုက်ရသည်။ ကျောင်းသွားဖို့ ကျောပိုးအိတ်လွယ်ကာ သူ့အခန်းမှ ထွက်လာသော သားကြီးသည်ပင် ၁၄ နှစ်သား ၉ တန်းကျောင်းသားကြီး ဖြစ်နေပြီ။ အချိန်တွေသည် ဘယ်လို ကုန်သွားလေသည်လဲ။ ရေချိုးခန်းထဲမှာ သွားတိုက်နေရင်းက သူ့ စိတ်အတွေးများ အတိတ်သို့ ပြန်ပြေးလွှားနေတော့သည်။

-----------------------------------------------------------------------------------

- သပိတ်... သပိတ်... မှောက်... မှောက်... -
- စစ်အစိုးရ... အလို မရှိ... -
- ဒီမိုကရေစီ ရရှိရေး... တို့ အရေး... တို့ အရေး... -
- အရေးတော်ပုံ... အောင်ရမည်... -

လွန်ခဲ့သော ၂၃ နှစ်က အသံများ သူ့နားထဲမှာ ဆူညံလာကြပြန်သည်။

- သြော်... ၂၃ နှစ်တောင် ရှိခဲ့ပါပေါ့လား... - သည်လိုတွေးရင် သူ့ရင်ထဲမှာ လေးလေးပင်ပင်ကြီး တခုကို ထမ်းပိုးထားရသလို ခံစားနေမိသည်။

ဘ၀၏ အချို့ အချိုးအကွေ့များက ညင်သာသည်။ တချို့ အချိုးအကွေ့များကတော့ တံတောင်ဆစ်ချိုး ကွေ့ချိုးကြီးများဖြစ်သည်။ ထိုကွေ့ချိုးကြီးများမှာ လူကိုယ်တိုင် လွင့်စင်ကျသွားနိုင်သည်။

၁၉၈၈ ခုနှစ် သြဂုတ်လ (၈) ရက် ကွေ့ချိုးကြီးထဲမှာ လူပေါင်းမြောက်များစွာ ဘ၀ပေါင်းမြောက်များစွာ လွင့်စင်ကျသွားကြဖူးသည်။ သည့်နောက် ၁၉၈၈ ခုနှစ် စက်တင်ဘာလ (၁၈) ရက် ကွေ့ချိုးကြီးထဲမှာ နောက်ထပ် ဘ၀ပေါင်းများစွာ လူပေါင်းများစွာ လွင့်စင်သွားခဲ့ကြပြန်သည် မဟုတ်လား။

ထိုကွေ့ချိုးကြီးမှာ သူလည်း လွင့်စင်သွားခဲ့သည်။ လွင့်စင်သွားခဲ့ကြောင်း သူ သတိထားမိသည့် အချိန်မှာ အခြားသော ထောင်ချီနေသည့် လူငယ်များနှင့် အတူ သူသည်လည်း ထိုင်းမြန်မာနယ်စပ် တနေရာမှာ ရောက်ရှိနေခဲ့ပြီ။

----------------------------------------------------------------------------------

တကယ်တော့ သူတို့ အားလုံးမှာ ရွေးချယ်စရာ သိပ်များများစားစား မရှိ။ စစ်အုပ်စုက ဖွင့်ထားသော လမ်း ၃ လမ်းသာ ရှိသည်။ ထို လမ်း ၃ သွယ်ကို သူတို့ အားလုံး ကိုယ့်ယုံကြည်မှုအလိုက် ရွေးချယ်လိုက်ကြရခြင်းသာ ဖြစ်သည်။

တလမ်းက ဥပဒေဘောင်အတွင်းမှာ ရွေးကောက်ပွဲလမ်း။ ထိုလမ်းကို လူ့ဘောင်သစ်ဒီမိုကရက်တစ်ပါတီ-အမည်ဖြင့် ၈၈ မျိုးဆက်များထဲမှ မိုးသီးဇွန်ဦးဆောင်ကာ လိုက်ခဲ့ကြသည်။ တနည်း ရွေးချယ်ခဲ့ကြရသည်။

နောက်တလမ်းမှာ မြေအောက်အဖွဲ့အစည်းအဖြစ် လျှို့ဝှက် ဆန့်ကျင်ကြရသည့် လမ်း။ ထိုလမ်းကို ဗကသ-အမည်ဖြင့် မင်းကိုနိုင် ဦးဆောင်ကာ ၈၈ မျိုးဆက်များက လျှောက်လှမ်းခဲ့ကြသည်။

နောက်ဆုံးတလမ်းကတော့... လက်နက်ကိုင် တော်လှန်ရေးလမ်း။ သည်လမ်းကတော့ ကြမ်းတမ်းသလို ရှုပ်ထွေးပွေလီ အန္တရာယ်လည်း များလှသည်။ သို့သော်လည်း သည်လမ်းကို ရွေးချယ်ခဲ့သည့် သူအပါအ၀င် ၈၈ မျိုးဆက်ဝင်များအဖို့ရာ ခေါင်းဆောင်မှု ပြဿနာကို ကြုံတွေ့ခဲ့ကြရသည်။ ထိုစဉ်က ရှိနေသည့် ဗကသ ခေါင်းဆောင်များထဲမှာ... လက်နက်ကိုင် တော်လှန်ရေးလမ်းပေါ် ရောက်လာသည့် မောင်မောင်ကျော်၊ ၀င်းမိုး၊ အောင်နိုင်... သူတို့က High Profile အဖြစ်ဆုံး...။ သို့သော်လည်း တကယ်တမ်း မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ခေါ်) မကဒတ ကို ဖွဲ့စည်းဖြစ်တော့ သူတို့ မပါဝင်လာတော့။ သည်အခါ လက်နက်ကိုင် တော်လှန်ရေး လမ်းကြောင်းကို ရွေးချယ်ခဲ့သည့် ၈၈ မျိုးဆက်များအတွက် ခေါင်းဆောင်မှုပြဿနာ ရှိလာသည်။

မကဒတ၏ ပထမအကြီမ်ညီလာခံမှာ ထွန်းအောင်ကျော်က ဥက္ကဋ္ဌ ဖြစ်လာသည်။ ရကသ ဥက္ကဋ္ဌအဖြစ် တာဝန်ယူခဲ့ဖူးသော သန်းဝင်းက အထွေထွေ အတွင်းရေးမှူးဖြစ်လာသည်။

လက်နက်ကိုင်တော်လှန်ရေးတရပ်ဆိုသည်မှာ လွယ်ကူသော ကိစ္စ မဟုတ်။ သူကတော့ လက်နက်ကိုင်တော်လှန်ရေးကိ်ု ဆင်နွှဲနေသော နိုင်ငံရေးအသိုင်းအ၀ိုင်းမှ ပေါက်ဖွားလာသူပီပီ ဤကိစ္စကို သိနေသည်။ ထိုစဉ်က သူ့ အသက်မှာ ၂၄ နှစ် သာ ရှိသေးသည်။ သို့သော်လည်း လီနင်-၏ ရေသောက်မြစ် ၃ သွယ်လို ကိစ္စမျိုးကိုလည်း နားလည်နေသေးသည်။ သည့်အတွက် သူကိုယ်တိုင် မကဒတ အဖွဲ့ဝင် ဖြစ်နေသည့်တိုင် မကဒတ၏ လက်နက်ကိုင်တော်လှန်ရေးအဖွဲ့အစည်းတခုအဖြစ် နေ့ချင်းကြီးလာသည့် ဖြစ်ရပ်ကို သူ လက်မခံနိုင်သေး။

မကဒတမှာ... နိုင်ငံရေးအရ အတွေးအခေါ် တခု ရှိနေပြီလား.... မကဒတမှာ... လက်နက်ကိုင် တော်လှန်ရေး လုပ်ဖို့ ကိုယ်ပိုင် လွတ်မြောက်နယ်မြေတခု ရှိနေပြီလား... မကဒတက ဆင်နွှဲမည့် လက်နက်ကိုင်တော်လှန်ရေးအတွက်... အင်အား ရေသောက်မြစ်တွေ ရှိနေပြီလား... သည်လို သူ့ဘာသာ မေးခဲ့သည့်တိုင်... ထိုစဉ်က သူက သာမန် ရဲဘော်တဦးမျှသာ-ဆိုတော့ကာ... သူ့အမေးများကို သူ့ဘာသာပဲ ဖြေခဲ့ရဖူးသည်။

နောက်တော့ ၁၉၈၉ ခုနှစ် စက်တင်ဘာလမှာ မကဒတ သေ့ဘောဘိုးစခန်း၏ တပ်ရင်း ၂ ရင်း အနက် တပ်ရင်း ၂၀၄ ၏ တပ်ရင်းမှူးအဖြစ် သူ တာဝန်ပေးအပ်ခံရသည်။ တပ်ရင်း ၂၀၄ ၏ ပထမဆုံး တပ်ရင်းမှူးမှာ ဦးမျိုးချစ်ဖြစ်သည်။ ဒုတိယမြောက် တပ်ရင်းမှူးမှာ ယခု လက်ရှိ မကဒတ ဗဟိုကော်မတီဝင် ဆလိုင်းယောအောင် ဖြစ်သည်။ သူက တတိယမြောက် တပ်ရင်းမှူးဖြစ်သည်။

သူ တပ်ရင်းမှူးအဖြစ် တာဝန်ယူရသည့် အချိန်မှာ မဟာမိတ် ကေအဲန်ယူ တပ်မဟာ(၆)နယ်မြေ ဒူးပလာယာခရိုင်ရှိ ဖလူးခံစစ်စခန်းကို ရန်သူက အပြင်းအထန် ထိုးစစ်ဆင်နေချိန်ဖြစ်သည်။ သူ့မှာလည်း ထိုအချိန်က ကော့ကရိတ်-နှင့်-၀င်းရေးမြို့နယ်အတွင်း ကေဒဲန်ဒီအို တပ်ရင်းတပ်ခွဲများနှင့် တွဲဖက်ပြီး လှုပ်ရှားစစ်ကို မိမိတပ်ဖွဲ့များအတွက် အတွေ့အကြုံယူနေရချိန်ဖြစ်သလို... ဖလူးခံတပ်စခန်းလို ခံစစ်သေအတွက်လည်း အင်အားများကို ထုတ်နှုတ်ထားရချိန်လည်း ဖြစ်သည်။ ထိုစဉ်က သူ့ ကွပ်ကဲမှုအောက်မှာ တပ်ရင်းဖွဲ့စည်းပုံထက် ကျော်လွန်သော လူအင်အား ရှိနေသည်။ တိုက်ခိုက်ရေး အင်အားကလည်း ရှိနေသည်။ မရှိသည်က - သေနတ်...သာ။ သေနတ် မရှိမှတော့ သည်လူတွေက တော်လှန်ရေးသမားတွေ မဟုတ်တော့။

သည်တော့ တပ်ရင်းမှူး တယောက်အနေဖြင့် သေနတ် အရှာ ထွက်ရတော့သည်။ မီးကျိုး မောင်းပျက်-ဟု ဆိုလျင် သေနတ်ကိုင်ဖူးသူများ သိလိမ့်မည်။ သူ့မှာတော့ မီးကျိုးကျိုး မောင်းပျက်ပျက်... ပစ်လို့ တချက် ထွက်ရင် ပြီးရော သေနတ်များကိုလည်း ၀ယ်ခဲ့ရဖူးသည်။ လျှို့လျှို့ဝှက်ဝှက် ၀ယ်ရသဖြင့် မောင်းတင်လို့ရရင် ပစ်လို့ရတာပဲ-ဆိုကာ မောင်းတင်ကြည့်ပြီး ပစ်မရသော သေနတ်များကိုလည်း ၀ယ်ခဲ့ဖူးသေးသည်။

နောက်ဆုံး Home-Made Rocket Launcher တွေပါ သူ ၀ယ်သည်.... တရုပ်လုပ် ၆၂ မမ ဒုံးပစ် လောင်ချာများက ဈေးကောင်းသည်... ပစ်ကောင်းသည်... ထိချက်ကောင်းသည်... သည်တော့ ၆၂ မမ လောင်ချာ အနည်းဆုံး ၂ လက်လောက်တော့ ရှိမှ ဖြစ်မည်... ပထမဆုံး ထွက်ခဲ့သော စစ်ကြောင်းအတွက် သူ စဉ်းစားရသည်... စစ်ကြောင်း တကြောင်းလုံးမှာ ၆၀ မမ မော်တာ တလက် ရှိသည်။ မော်တာအသီး အလုံး ၃၀ ကျော် ရှိသည်။ အာရ်ပီဂျီ-၅ တလက် ရှိသည်။ ဒုံးကျည် (၇) လုံး ရှိသည်။ အဲမ်-ဖော်တိ တလက် ရှိသည်။ အသီး - ၃၀ - လောက်ရှိသည်။ ခုတော့ ၆၂ မမ ၂ လက် ရပြီ။ အသီးကတော့ အဖူး(တပ်မဟာ-၆ မှူး) ဆီမှာ တောင်းရမည်။ စက်လတ် တလက်တော့ မရှိမဖြစ် လိုအပ်သော်လည်း မ၀ယ်နိုင်တော့။ ထိုစဉ်က အေကေ စက်လတ် တလက်က ဘတ် တသောင်းခွဲလောက် ဈေးပေါက်သည်။ ၁၆ စက်လတ်တလက်က ၂သောင်းခွဲလောက်ရှိသည်။ သေနတ်များကို ကိုင်ကြည့် ပစ်စမ်းရုံကလွဲလို့ ဈေးပင် မဆစ်ရဲ။

---------------------------------------------------------------------------------

နောက်တော့ ၁၉၈၉ ဒီဇင်ဘာ လကုန်ခါနီး ၂၉ ရက်မှာ ဖလူး ခံစစ်စခန်းကြီး အကြောင်းကြောင်းကြောင့် ရန်သူ့လက်သို့ကျသွားသည်။ သည်စဉ်က သူ့မှာ ရှိရှိသမျှသော အကောင်းဆုံး ရဲဘော်များ၊ အတွေ့အကြုံရှိပြီး ရဲဘော်များနဲ့ လူသစ်များကို အသေအချာ တွဲပြီး ဖလူး ခံစစ်စခန်းအတွက် အားဖြည့်ရန် ၆၅ ယောက်ကို ထုတ်နှုတ်ထားခဲ့သည်။ ပထမအသုတ် တပ်စုနှင့် သူကိုယ်တိုင် စုရပ်မှ စတင် ထွက်ခွာစဉ်မှာပင် မနက် အစောကြီး ၉ နာရီမှာ က/န ၀င်လာသည်။ စခန်းကို ပြန်လှည့်ရန်နှင့် တပ်ရုတ်ဆုတ်ခွာမှုအားလုံးကို ၂၄ နာရီအတွင်း အပြီး စီစဉ်ရန်။ သူကိုယ်တိုင် ၁၉၈၉ ဇွန်လမှာ တလလုံးနီးပါး တပ်စု တစုနှင့်အတူ ရန်သူကို ရင်ဆိုင်တိုက်ခိုက်ခဲ့ဖူးသော သည်ခံတပ်စခန်းကြီး ကျသွားပြီဆိုသော သတင်းကို သူ မယုံနိုင်။ တော့နော်- ဟု သူတို့ ခေါ်သော တပ်မဟာ(၆) စက်ကြီး (ဆသရ-ဗဟို) ကို သူလှမ်းခေါ်သည်။ (ဟုတ်တယ်- ဖလူး ကျသွားပြီ၊ ၂၄ နာရီအတွင်း စခန်းကို ဆုတ်ပါ...) ဟူသော အမိန့်ကိုသာရသည်။ ထိုအဖြစ်အပျက်သည် သူတို့ စခန်းအတွက် အချိုးအကွေ့ကြီးဖြစ်သည်။

ရှေ့တန်းသို့ ချီနေသည့် သူ့ စစ်ကြောင်းတခုလုံး နောက်တန်းစခန်းသို့ ခြေဦးပြန်လှည့်လာသည့် လမ်းမှာ အားလုံး တိတ်ဆိတ်။ မည်သည့် အသံတခုမျှ မထွက်။ နှလုံးသားတွေ ကွဲအက်နေသည်လား...။

အခြေချရာ စခန်းသို့ ပြန်ရောက်တော့ အနီးဆုံး အလုံခြုံဆုံး မွတ်ဆလင် စခန်း တခု ရှိရာ မောကဲရွာသို့ ဆုတ်ဖို့ ပြင်ရသည်။ မီးရှို့စရာ ရှိသည်များကို မီးရှို့၊ ဖျက်ဆီးစရာ ရှိသည်များကို ဖျက်ဆီး၊ မြေမြှုပ်ပစ်သင့်သည်များကို မြေမြှုပ် အတော့ကို အလုပ်ရှုပ်သွားကြသည်။ သို့သော်လည်း ကိုယ်တိုင် လက်ဖြင့် တည်ဆောက်လာခဲ့သော ဘားတိုက်များကို မီးရှို့ပစ်ကြဖို့ကိုတော့ သူတို့ အားလုံး မရှို့ပစ်ကြရဲ။ စခန်းမှာ ရှိရှိသမျှ လူအားလုံး မောကဲရွာသို့ ဆုတ်ခွာသွားပြီးပြီ။ သူနှုင့် သူ့ စစ်ကြောင်းမှ တပ်စု တစု သာ ကျန်နေခဲ့သော သေ့ဘောဘိုးစခန်းသည် တိတ်ဆိတ် ငြိမ်သက်လျက်.... ပထမဆုံး အကြိမ်အဖြစ် သူ့ စိတ်ထဲမှာ အားငယ်စိတ်များ ၀င်လာသည်။ ဖလူးပြီးတော့ ကျောက်ခက်၊ ကျောက်ခက်ပြီးတော့ သေ့ဘောဘိုး၊ သေ့ဘောဘိုြးုပီးတော့ ဝေါ်လေ၊ ဝေါ်လေပြီးရင်... ငါတို့ ဘယ်ကို ဆုတ်ရဦးမလဲ...။

---------------------------------------------------------------------------------

ဖလူး ကျလဲ ဘာဖြစ်မှာလဲ... ဘာမှမဖြစ်ပါဘူး...။ strategic post တခု ကျသွားသည့်အခါ နောက်ဆက်တွဲ ဘာတွေဖြစ်မည်လဲကို တပ်မှူးတိုင်း သိပါသည်။ ဖလူး ခံစစ်စခန်းဖြင့် ထိန်းသိမ်းထားနိုင်သော ထောက်ပံ့ရေးလမ်းကြောင်းအားလုံး ဆုံးရှုံးသွားသည်၊ လုံခြုံရေးအားလုံး ဆုံးရှုံးသွားသည်။ ရန်သူက တံခါးမရှိ ဓါးမရှိ ၀င်ထွက်နိုင်ပြီ ဆိုမှတော့ ဘာမှ မဖြစ်ပါဘူး မျက်စေ့မှိတ်ပြောလို့က မရတော့ပြီ။ အခြေအနေက ကိုယ့် အင်အားဖြင့် overtake ကလည်း ပြန်မလုပ်နိုင်တော့ အရာအားလုံးက mobile ဖြစ်ကုန်တော့သည်။ အရင်က သူတို့ အခြေခံစခန်းလေးက ခုအခါမှာ ကျီးနှင့် ခြောက်ခြောက်။ ကိုယ့်တပ်ကိုပါ body နှင့် မထားနိုင်တော့။ ပျောက်ကျား တပ်စိပ်တွေ အဖြစ် ခွဲထုတ်ရသည်။ ဆွဲဆန့်ရသည်။ ထိုအခါ... မဟာမိတ် ကေအဲန်ယူ တပ်စိတ်များနှင့် တွဲရသည့်အတွက် ကိုယ့် အင်အားတွေက ဟိုတကွက် သည်တကွက်.... မကဒတမှာ ကိုယ်ပိုင် လွတ်မြောက်နယ်မြေ မရှိသေးတာကို သူ အတော် စိတ်တိုသည်။ ခုလောဆယ်တော့ ရှိစေပေါ့လေ။

---------------------------------------------------------------------------------

သည်လိုနှင့် သည် ကွေ့ချိုးကြီးတခုမှာပဲ သူုကိုယ်တိုင် လွင့်စင်ထွက်သွားသည်။ တရက်သားမှာ မောင်လွမ်းဏီ-ဆိုသော ကဗျာဆရာနှင့် သူတွေ့လိုက်ချိန်မှာ နောက်ထပ် ကွေ့ချိုးကြီး တခုကို သူ တွေ့လိုက်ခြင်းဖြစ်သည်။ လူတိုင်းက ချစ်သော၊ လူတိုင်းနှင့် အလွမ်းတည့်သော မောင်လွမ်းဏီ။ သူနှင့် အလွမ်း မတည့်စရာ ဘာရှိမည်နည်း။ ကဗျာတွေကို ချစ်သော သူ့အတွက် သူရေးထားသော မဖြစ်ညစ်ကျယ် ကဗျာလေးတွေကို တခုပ်တရ ဖတ်ရှု ပြုပြင်ပေးသူ... သူ့ ကဗျာ လက်ဦးဆရာမှာ မောင်လွမ်းဏီဖြစ်လေသည်။ သူ့ကိုလည်း ညီအရင်းတယောက်လိုချစ်သော မောင်လွမ်းဏီ။ တခါတခါလည်း သူနှင့် မောင်လွမ်းဏီ အကြီးအကျယ် ရန်ဖြစ်ကြသည်။ မင်းဟာ... ဦးလှရွှေ သား မဟုတ်ဘူးဟု ပြောသော မောင်လွမ်းဏီ စကား အပေါ် သူအနာပေါ် ဒုတ်ကျဘူးသည်။ ကျနော်က ဘယ်သူ့ သားမှ မဟုတ်ဘူး ကိုလွမ်းဏီ-ဟု သူ အကျယ်ကြီး ပြန်အော်ဖူးသည်။ ဘာပဲဖြစ်ဖြစ် ကိုလွမ်းဏီသည် မကဒတမှာ တာဝန်ကျေပွန်နေနေဆဲ...။ ကျနော်ကသာ အဝေးမှာ။ သို့သော်လည်း ကိုလွမ်းဏီနှင့် ကျနော့် နှလုံးသားများ နီးနေသည်ကို ကိုလွမ်းဏီ သိပါသည်။

----------------------------------------------------------------------------------

ရာသီများ ပြောင်းသလို အချိန်ကာလများ အခြေအနများ ပြောင်းခဲ့ပြီ။
သို့သော်လည်း ကျနော်တို့ စိတ်များ ယုံကြည်ချက်များ မပြောင်းလဲသေးပါ။

လက်နက်ကိုင် တိုက်ပွဲဖြင့်သာ အဆုံးသပ်တိုက်ပွဲကို ရယူနိုင်မည်ဟု ယုံကြည်ခဲ့သဖြင့်သာ လက်နက်ကိုင် တော်လှန်ရေးလမ်းကြောင်းပေါ်ကို ကျနော်တို့ လျှောက်လှမ်းခဲ့ခြင်း ဖြစ်ပါသည်။

၂၃ နှစ်တာ ခရီးမှာ မကဒတ၏ အလံတော်သည် ယနေ့ထက်ထိ အမြင့်မားဆုံး လူးလွန့်လျက်...

တနေ့နေ့မှာ ရန်ုကုန်မြို့တော် ခမ်းမရှေ့မှ အလံတိုင်မှာ ကျနော်တို့ မကဒတ အလံကို လွှင့်ထူပါမည်...

(အောင်သာငယ်)

on Wednesday, October 12, 2011 at 6:56am

ဖြည့်ဆည်းစရာမလိုသော ကွက်လပ်များဖြင့် ခမ်းခြောက်နေသော လေဟာနယ်များ...


တနေ့တာ အလုပ် ပြီးသွားချိန်မှာ ကြမ်းပြင်ပေါ် ပစ်ချလိုက်သော အ၀တ်တစလို သူ ပုံကျသွားသည်။ သူ့ရင်သည် ဖုတ်လှိုက် ဖုတ်လှိုက် ဖြစ်သွားသည်။ အလိုလိုကို သူ မောဟိုက်နေသည်။ အလုပ်ပြီးသွားလို့ စိတ်ကိုလျှော့ချမိတာကြောင့်လည်း ဖြစ်နိုင်သည်။ လဲပြိုကျမလိုဖြစ်နေသော ခန္ဓာကိုယ်ပေါ်သို့ သူ့ ရိန်းကုတ်ကြီးကို စွတ်လိုက်ရင်း "ငါလည်း ခု တော့ တကယ့်ကို ပို့လန်းဒါး-ကြီး ဖြစ်နေပါ့လား" ဟု တွေးလိုက်မိသေးသည်။ ပို့လန်းသား မှန်လျှင် ကျောပိုးအိတ် တလုံး၊ ရိန်းကုတ်တထည်၊ ခေါက်ထီးတချောင်း၊ ရေဘူးတဘူး၊ ဘတ်စ်ပါ့စ်တခု၊ ဦးထုပ်တလုံး ရှိကိုရှိရမည် မဟုတ်လား။ ရိန်းကုတ်ကို ဇစ်တပ်ပြီးနောက် ကျောပိုးအိတ်ကို စစ်သားတယောက် လွယ်သလို သူလွယ်လိုက်သည်။ လွယ်ရင်းက သေနတ်တလက် ကျောပိုးအိတ်တလုံးနှင့် သူ့ အတိတ်က အရိပ်အချိန်တခုကို သတိရမိသွားသေးသည်။ ဘတ်စကားဂိတ်သို့ လှမ်းနေသော သူ့ခြေလှမ်းတခုနှင့်တခုအကြားမှာ သေနတ်သံတွေကို သူကြားနေရသည်။ လက်နက်ကြီး ကွဲသံတွေ။ သူငယ်ချင်း ယောဟန်အောင်၏ ကဗျာ... - ဗုံးသီးကွဲမြောက်၊ မောင်းပြန်ပေါက်ထွက်၊ အတွဲဆက်တွေ... ဆူပွက် အော်ဟစ်၊ ပစ် ပစ် ပစ်ကြ... ဖေါက်ပြန်သူတွေ- တို့ပစ်ရမယ်... - သူ့ သွေးကြောတွေ တင်းကနဲ ဖြစ်သွားသည်။ သူ့ ကျောပိုးအိတ်ထဲမှာ ပါလာသည့် ၀ိုင်အနီပုလင်းကြီး နှလုံးကို အာရ်ပီဂျီ-ဆဲဗင်း ဒုံးကျည် နှစ်လုံးလို လက်ပြန် ယောင်ရမ်း လှမ်းဆုပ်လိုက်မိသေးသည်။

----------------------------------------------------------------------------------

ဘတ်စကားဂိတ်သို့ သူရောက်တော့ မည်သူမျှ မရှိသေး။ ကားဂိတ်က ခုံတန်း ၂ ခုအနက် ညာဖက် ခုံတန်း အစွန်းမှာ သူ ထိုင်ချလိုက်သည်။ ဘောင်းဘီအိတ်ထဲမှ အိုင်ဖုန်းကို ထုတ်ကာ Bus Stop ID No. ကို TriMet Message ထဲ ရိုက်ထည့်လိုက်တော့ ၁၉ မိနစ် စောင့်ရမည်-ဟု ပေါ်လာသည်။ နောက်တော့ မိန်းမ တယောက် ရောက်လာပြီး တဖက် ခုံတန်းမှာ သွားထိုင်သည်။ စီးကရက် အနံ့ကို ဆိုးဆိုးရွားရွားရလာသဖြင့် သူ လှည့်ကြည့်မိတော့ ထို မိန်းမ လက်ထဲက စီးကရက်ကို မြင်သည်။ "ဟင်း... စီးကရက်အနံ့ရလို့ ကြည့်လိုက်ရင် မိန်းမတွေချည့်... " သူ့ ဘာသာ စိတ်ထဲက ပြောလိုက်မိသေးသည်။ သူကိုယ်တိုင်လည်း ဆေးလိပ်သောက်သူ တယောက် ဖြစ်ခဲ့ဖူးသည်။ သို့သော်လည်း လွန်ခဲ့သည့် ၁၂ နှစ်က သူ ဆေးလိပ် ဖြတ်ခဲ့သည်။ တရက်တည်းနှင့် ဖြတ်ခဲ့ခြင်းဖြစ်သည်။ ဆေးလိပ်ဖြတ်ပြီ-ဟု သူဆုံးဖြတ်လိုက်သည့် အချိန်မှာ သောက်လက်စ စီးကရက်ဘူး၊ အသစ်ချပ်ချွတ် နောက်တဘူးနှင့် ဇစ်ပိုမီးခြစ်-ကိုပါ အမှိုက်ပုံးထဲ သူ လွှင့်ပစ်ခဲ့သည်။ ယနေ့ထက်ထိ လုံးဝကို သူပြန်မသောက်တော့။ ဖြတ်စရာ ရှိလျင် သူက အပြတ်ဖြတ်တတ်သူပေပဲလား။ သူ့ဘာသာသူလည်း သေချာ ရေရာ မသိပါ။ သေချာတာကတော့ ဆေးလိပ်ကို တရက်တည်းနှင့် ဖြတ်ခဲ့တာတော့သေချာသည်။ နောက်ထပ် ဘယ်အရာတွေကို သူ အပြတ်ဖြတ်ရဦးမည်နည်း။ သူမသိသေးပါ။

----------------------------------------------------------------------------------

ဘတ်စ်ကို စောင့်နေဆဲ လမ်းထောင့်ချိုးအကွေ့မှ မည်းကနဲ တစုံတခုက ရုတ်တရက် ပေါ်လာတော့ သူ လန့်ဖြတ်သွားသည်။ ပြိုင်စက်ဘီးတစီးနှင့် လူတယောက်။ စက်ဘီးပေါ်မှ ဆင်းပြီး စက်ဘီးကို ကားဂိတ် နံရံမှာ ထောင်ကာ ခုံတန်းမှာ ထိုင်တော့မှ သေချာကြည့်မိသည်။ လူငယ် တယောက်၊ သူ့သားကြီးထက် ကြီးလှမှ ၃-၄-၅ နှစ်ပေါ့။ နေပါဦး... မျက်နှာကိုကြည့်ရတာ ဆံပင် တိုပေမယ့် မိန်းကလေးလိုပဲ။ သူ နောက်ထပ် တခါ သေချာ ပြန်ကြည့်တော့ လူငယ်က သူ့ကို ပြန်ကြည့်သည်။ သူ မျက်နှာ လွှဲလိုက်သည်။ မိန်းမချောချောတဲ့ ယောက်ျားလေးလား... ။ စပ်စုချင်စိတ်တွေက သူ့ရင်ထဲ တဖွားဖွားပေါ်နေသည်။ တကယ်ဆို- ဒါက သူ့ အလုပ်မှ မဟုတ်တာ။ ဘာကြောင့် ကျား-လား ... မ-လား... ငါက သိချင်နေရတာတဲ့လဲ။ သူ့ဘာသာသူ မေးရင်း မသိမသာ လူငယ်ကို လှမ်းကြည့်လိုက်မိသည်။ ခန္ဓာကိုယ် အဆက်အပေါက်ကတော့ ယောကျာ်းလေး မဟုတ်တာ သေချာသည်။ အင်း... ခက်တော့တာပဲ။ Are you boy or girl - ဟု သွားမေးလို့ကတော့ ပါးရိုက်ခံရမှာ သေချာသည်။ တခုခုပေါ့ကွာ... မင်းအလုပ် မဟုတ်ဘူး... ကားစောင့်မှာသာ စောင့်နေ... အရစ်တွေ မရှည်ချင်နေနဲ့... - ဟု သူ့ကိုယ်သူ အသံတိတ် ဆဲလိုက်သည်။ ဆဲနေရင်းကကို... "အင်း... သေချာပါတယ်... အဲဒါ ကောင်မလေးပါကွာ... " - ဟု စိတ်ထဲက ပြောဖြစ်အောင် ပြောလိုက်မိသေးသည်။ တကယ်တော့ သူလည်း မသေချာပါ။ မိန်းမချောချောတဲ့ ယောက်ျားလေး တယောက် ဖြစ်နိုင်သလို... ယောက်ျားလေးဆန်သော မိန်းကလေး တယောက်လည်း ဖြစ်နိုင်ပါသည်။

---------------------------------------------------------------------------------

သည့်နောက်တော့ ဘာတွေ ဘယ်လိုဖြစ်သည် သူမမှတ်မိတော့။ မီးနီ မီးပြာတွေ သူ့ မြင်ကွင်းမှာ လက်လက် ထသွားတော့မှ သူ့ အသိစိတ်က သူ့ ဆီ ပြန်ဝင်လာသည်။ သူ သတိပြန်လည်လာခြင်းလား။ မဟုတ်ပါ။ သူက သတိလစ်မသွားပါ။ တကယ်တော့ သူ့ အကြည့်က မီးပွိုင့် အလည်ခေါင်ကို ရောက်နေသည်။ သို့သော်လည်း ဘာကိုမျှ မြင်ပုံမပေါ်။ မီးနီ မီးပြာများဖြင့် ဆေးရုံကားတစီး... ရဲကားတစီး သူ့မြင်ကွင်းထဲ ရောက်လာတော့မှသာ သူက အသိစိတ်ဆီ ပြန်ရောက်သွားခြင်းဖြစ်သည်။ သည် အရေးပေါ်ကားများ မလာမီ သူက ဘယ်ဆီ ရောက်နေသည်လဲ။ ဘယ်ကိုမျှ မရောက်ပါ။ ဘတ်စ်စတော့ပ်မှာ ထိုင်နေခြင်းပါ။ သို့သော်လည်း သူ့ အကြည့်များ၏ လားရာမှာ မီးပွိုင့် အလည်ခေါင်တည့်တည့်သာ ဖြစ်သည်။ တမင်တကာလည်း သူ မကြည့်ပါ။ သူ့အကြည့်များကလည်း ရည်ရွယ်ချက် မရှိပါ။ ကြည့်စရာ မရှိသော မီးပွိုင့်အလည်တည့်တည့်ကို သူကြည့်နေမိသည်ကလည်း ရည်ရွယ်ချက် ရှိရှိ မဟုတ်ပါ။ သေချာသည်ကတော့ သူက စိတ်နှင့် လူ မကပ်ခြင်းသာ ဖြစ်မည်။ သို့ မဟုတ် သူ့ အသိစိတ်နှင့်သူ ခေတ္တခဏ အဆက် အသွယ် ပြတ်သွားခြင်းလည်း ဖြစ်နိုင်သည်။ သို့မဟုတ် မသိစိတ်က အသိစိတ်ကို အနိုင်ယူသွားတာလည်း ဖြစ်နိုင်သည်။

ခုတော့ အရာအားလုံး ရှုပ်ထွေး နေကြလေပြီ။

---------------------------------------------------------------------------------

ကျနော့်ကို ၀ိုင်အနီ တခွက်လောက်တိုက်ပါ...
ဗန်ပိုင်းယားတွေ သွေးသောက်သလိုမျိုး...
ကျနော့် ခြောက်သွေ့မှုတွေကို ကျနော် သောက်မယ်...

သူ့ ကဗျာ တပုဒ် အတွက် အစပျိုးထားသော ၀ါကျ တခုကို...
သူသည် သူ့ဘာသာ အလိုလို... ခြောက်ခြားနေလေသည်...။

ထိုနေ့က လမထွက်ပါ...
ထိုညမှာ နေမပွင့်ပါ...
ကမ္ဘာကြီးသည်
၂၃ နှင့် နှစ်ပိုင်းတပိုင်းဒီဂရီစောင်းကာ
လည်မြဲ လည်နေပါ၏၊

atn

on Sunday, October 9, 2011 at 11:42pm

Oct 23, 2011

ဟိုးအမြင့်ဆုံးနံရံတွေပေါ်မှာ လွတ်လပ်မှုကို ကျနော် ယူခဲ့တယ် မေမေ...
















ကျနော်ဟာ လူဆိုး မဟုတ်သလို...
ကျနော်ဟာ လူကောင်းလည်း မဟုတ်ပါဘူး မေမေ...

အများအကျိုး ဆောင်ခဲ့ဖူးသလို
အတ္တကိုလည်း အစွမ်းကုန် ကြီးထွားစေခဲ့ဖူးပါတယ်....

ငယ်ငယ်တုန်းက လိမ္မာခဲ့သလောက်....
အသက်ကြီးလာလေလေ တစောက်ကန်း မိုက်ကန်းနေဆဲပါ...

တခြား လူတွေကို ကျနော် လိမ်ရင် လိမ်မယ်...
ကျနော့်ကိုယ် ကျနော် ဘယ်အခါမှ မလိမ်ဘူး...

လူမြင်ကွင်းမှာ သူရဲကောင်းကြီး ဘယ်တုန်းကမှ
ကျနော် မလုပ်ခဲ့ဖူးဘူး...

ကျနော့် ကို အထင်ကြီး အမြင်ကြီးအောင်
စကားလုံးကြီးကြီးတွေ ကျနော့် နှဖူး ရင်ဘတ်မှာ
ဘယ်တုန်းကမှ ကပ်မထားခဲ့ဖူးဘူး...

ကျနော့်ကို အထင် အမြင်သေးမှာကိုလည်း
နည်းနည်းလေးမှကို စိတ်မ၀င်စားဘူး...

ကျနော့်အောက်စီဂျင်ကို ကျနော် ရှူနေရတာပါမေမေ...
သူတပါး အထင် အမြင်တွေ ကျနော်က ဘာလို့ ရှူသွင်း သယ်ဆောင်နေရမလဲ...

လူတွေဆိုတာ ခေါင်းနဲ့ပန်းလို...
အားလုံး နှစ်ခြမ်းရှိကြတာပါပဲ...

လူအများစုက အမှောင်ခြမ်းကို
ဖုံးလွှမ်းထားတတ်ကြတာပဲ မဟုတ်လား... မေမေ...

ကျနော့်မှာတော့ ဘာကိုမှ ဖုံးလွှမ်းလိုစိတ်မရှိဘူး....
ကျနော့် အဖြူအမည်း နှစ်ခြမ်းလုံးကို တံခါးဖွင့်ထားတယ်...

ကြီးကြီးကျယ်ကျယ် စာတွေ ကဗျာတွေ ကျနော် မရေးဘူး...
ကျနော့် နှလုံးသားနဲ့ ခံစားရတာတွေပဲ ကျနော် ရေးတယ်...

ကျနော့် စာတွေ ကဗျာတွေကြောင့်
ကျနော့်ကို အထင်ကြီးခြင်း သေးခြင်းတွေကိုလည်း ကျနော်က သယ်ဆောင်မထားဘူး...

ကျနော်ဟာ ထောင်ဖောက်ပြေးခဲ့သူတဦးပါ... မေမေ...
လူတကာကို ချုပ်နှောင်တဲ့ အထင်ကြီးခံလိုခြင်း အထင်သေး မခံလိုခြင်း အကျဉ်းထောင်ကို
အောင်မြင်စွာ ကျနော် ဖောက်ခဲ့ပြီ မေမေ...

ယောနသန်ဇင်ယော်လို ဟိုးအမြင့်ဆုံးနံရံတွေပေါ်မှာ
ကျနော် ပျံသန်းရပ်နားနေပြီမေမေ...

atn

Sep 24, 2011

ဧရာဝတီမြစ်ကို ကျနော် ချစ်တယ်... မဟင်္သာ....


















အက်စ်တိုးရီးယားနဲ့ ကိုလံဘီယာမြစ်ကိုတောင်
ကျနော် ချစ်ခဲ့ပါတယ်... မဟင်္သာ...

မန္တလေးတောင်နဲ့ ဧရာဝတီမြစ်ကိ်ု
ကျနော် မချစ်ပါဘူးလို့...
ဘယ်လို အရူးကမှ ပြောလို့ မရပါဘူး ....

မြစ်မင်း-ဧရာ ခွေကာဝိုင်းလို့
စစ်ကိုင်း အောင်ခြာမြေ...
ရေလှိုင်းလေးတွေ နေရောင်ဖျူးတော့
ရွှေရောင်လူးကာနေ...
ငွေတောင်ဦးမှာ ရှုမျှော်ခင်းနဲ့ မြစ်တွင်း သံသာပေ...

ဧရာဝတီကို
ဖွဲ့ဆို တေးသွားများ...
ကျနော်တို့ နှလုံးသွေးတွေကြားမှာ
လူးလားခေါက်တုန့်...

ကျနော့် ပုံချထားတဲ့ နေ့ရက်တခုမှာ
ဧရာဝတီက ဇာတ်လိုက်ကြီး...

ဧရာဝတီ...
ဧရာဝတီ...

ဧရာဝတီ...
ဧရာဝတီ...

တည်ြငိမ်တဲ့ သူ့ရဲ့ ရေအလျဉ်
ရင်ကျက်တဲ့ရေပြင်...

ကျနော် ရင်နာနေမိပေါ့ မဟင်္သာ...

ကျနော့ အကိုကြီး ခင်ဝမ်းကို...
ကျနော် လွမ်းပါတယ်...

ဧရာဝတီရယ်...
အောင်သာငယ်....
ဘာပြောရမယ် မသိတော့ဘူး....

Sep 12, 2011

နံရံကို လက်သီးနဲ့ ထိုးမိတော့မယ်...
















တကယ်တမ်းမှာတော့...
ငါဟာ
လေထုကို တိုးခွဲ ဖြတ်ထွက်သွားနေတဲ့
သေနတ်ကျည်ဆန်တတောင့်ပါ...

ငါ့ကို ပစ်ဖေါက်လိုက်ပြီဆိုတော့
ငါက နောက်ပြန်လှည့်လို့ မရတော့ဘူးလေ...
ရှေ့ဆက်တိုးဖို့သာ ငါ့ ပြက္ခဒိန်...

ငါ့ မေးခွန်း တချို့က...

ကျည်ဆံတတောင့်အဖြစ်
ငါက ဘယ်သေနတ်ပြောင်းရင်းထဲ...
ဘာအကြောင်းကြောင့်
မောင်းသွင်း ခံထားခဲ့ရတာတဲ့လဲ...

အဲသည့် သေနတ်ကို
ဘယ်သူက...
ဘာအကြောင်းကြောင့်
မောင်းတင်ပစ်ဖေါက်လိုက်ရတာတဲ့လဲ....

ငါက ဘယ်ပစ်မှတ်ကို
ဘာကြောင့် သွားရောက် ထိမှန်ရမှာတဲ့လဲ...

atn

Sep 10, 2011

သတိရတယ် မာရီယာ...














ညှာတာသောအားဖြင့်
အပြင်းစား သုခ တချို့ ငါ့အားပေးပါ့...
ဘ၀အား ရင်ခုန်ချင်နေသော ငါ့နာရီလက်တန်တွေ
သွက်သွက်လည်အောင် မြန်နေပြီ... မာရီယာ....

ကိုယ့်ဘာသာကိုယ် ပေးထားတဲ့ ဘွဲ့တံဆိပ်တွေကို
အရူးဗိုလ်ချုပ်တွေလို
သူတို့ ရင်ဘတ်မှာ
အလကားမတ်တင်း ချိတ်ဆွဲထားတာမျိုး မဟုတ်ဘူး...

ငါ့... အသက်တာ တခုလုံးမှာ...
ချိတ်ဆွဲလို့ရတာတွေ အားလုံး...
ငါ့ ဘ၀ကြီးတခုလုံးနဲ့ လဲလှယ် ချပ်ရပ်ပြီး...
ငါ့ရင်ဘတ်မှာ
ချိတ်ဆွဲခဲ့ပါတယ်... မာရီယာ...

လူသားချင်း စာနာမှု...
ကုသိုလ်ကောင်းမှု...
ကိုယ်ချင်းစာမှု...
အများအကျိုးဆောင်မှု...
ကိုယ်ကျိုးစွန့်လွှတ်မှု...

ထွက်မြောက်ရာလမ်းဟာ
ငါ့ရင်ဘတ်ပေါ်မှာတော့ မဟုတ်တော့ဘူး...
ဒါကိုလည်း ...
ငါ ကောင်းကောင်း သိတာပေါ့... မာရီယာ...

ဘုရားသခင်လည်း ငါ မဟုတ်တော့...
နေရာတကာ... ဖြစ်စေ-လို့ ငါ ရွတ်ဖတ်လို့ မရဘူးလေ...

နေ့စဉ်ရက်ဆက် မဟုတ်လည်း...
ကျိုကြား ကျိုကြား ဖြစ်စေဦး...
နင့်ကို သတိရနေဦးမယ်... မာရီယာ...

မလွတ်မြောက်နိုင်သေးသရွေ့...
နင်နဲ့ ငါဟာ...
အတူတူပါပဲ... မာရီယာ...

ခုရက်တွေထဲ
နင့်ကို... ငါ...
လေးထောင့်ဆန်ဆန်
သတိရမိနေပြန်ပေါ့... မာရီယာ...

atn

Sep 7, 2011

စခီဇိုဖရီးနီးယား-၂












စိတ်-ပါဆိုမှကွယ်...
ဆိတ်-လိုပေါ့...
ဆိတ်က မနားတမ်း ၀ါးသလို
စိတ်-ကလည်း မနားတမ်းသွားတယ်...
ဗီဇာ မဆောင်ဘူး...
ဇီဇာ မကြောင်ဘူး...

နေ့မဆိုင်း ညမဆိုင်း
စက္ကန့်တိုင်းမှာ...
ဗမာပြည်ကို အလည်ပြန်ချင်လည်း ပြန်တယ်...
ပြန်တိုင်းလည်း (နေ့ခင်း အိပ်မက်) ထဲမှာ...
ကဲ... မခက်ပါလား... ကွယ်တို့...
စိတ်-ဟာ အဲသလို...

သွားရင်းလာရင်း ခလုပ်တိုက်...
ရီးစားဦးကို သတိရလိုက်မိတာကလည်း... စိတ်...
သုံးရင်း ဖြုန်းရင်း ပိုက်ဆံပြတ်တော့
နောက်ဆုံးဖြတ်ခဲ့တဲ့ ရီးစားကို သတိရမိသွားတာကလည်း... စိတ်...
ကားမောင်းရင်း မီးပွိုင့်နီသွားတဲ့အခါ
ကားလေးတစင်းကို ၀ယ်ရင် ဘရိတ်ပါပါစေ-လို့
နော်လီဇာ သီချင်းကို ဆိုဆိုပြတတ်တဲ့ ရီးစားကို
သတိရမိသွားတတ်တာကလည်း... စိတ်....

ကွန်ပြူတာ မှတ်ဥာဏ်... တပ်ဆင်...
ဘိုင်နရီစစ်စတမ်... ကျင့်သုံး...
အသွား-အပြန်... ခရီးလွန်...
အွန်-အော့ဖ်... ခလုပ်များ... ဖွင့်-ပိတ်...
အဲသည်လို... စိတ်... တွေ...

စတြာတိုစဖီးယား...
ဘလော်ဂိုစဖီးယား...
စခီဇိုဖရီးနီးယား...

အသံတွေ ကျယ်လောင်စွာ ကြားနေတယ်...
ငါ့ကို စကား မပြောကြပါနဲ့တော့...
ပါရာနွား-တွေ ငါ့ကို ကိုက်နေတယ်...
ဖိုဘီးယား-တွေ ငါ့ကို ကိုက်နေတယ်...

း((

atn

စခီဇိုဖရီးနီးယား-ကို ဖတ်ချင်ရင်တော့ သည်မှာပါ...

Sep 6, 2011

မီရှဲလာ၊ နာတာလျာ၊ မာရီယာ နဲ့ ငါ...



















နင့် ဆံပင် ကောက်ကွေးလေးတွေကို ကြည့်လို့ရှုလို့ အကောင်းဆုံးဖြစ်အောင်
ဆင်ယင်ထုံးဖွဲ့လိုက်ပါဦး မီရှဲလာ...
တော်နေကြာ အလုပ် ပြုတ်တော့မလို မျက်နှာမျိုးနဲ့
နင် မဲ့တဲ့တဲ့ ဖြစ်နေတာမျိုး ငါ မမြင်ချင်ပါဘူး...
ပြီးတော့ နင် ပန်နေနေကျ ပန်းအ၀ါရောင်ကြီးကိုလည်း ပန်မလာပါနဲ့တော့...
ခုတလော ငါ ခေါင်းနောက်နေလို့ပါ...

ကောင်းသော နေ့လည်ခင်းပါ နာတာလျာ...
ခုတလောမှာ နင့်ကို ငါ နှုတ်မဆက်ဖြစ်တာ ကြာပြီ...
ငါကလည်း သိပ် အလုပ်မအားသူပါ...
နင်ကလည်း သိပ် အလုပ်များသူပါ...
ငါကလည်း သိပ် မပြုံးတတ်သူပါ...
နင်ကလည်း တချိန်လုံး ပြုံးနေသူပါ...
နင့် မျက်နှာဖြူဖွေးဖွေးလေးဟာ ချစ်ဖို့ သိပ်ကောင်းတယ်...
ကျေးဇူးပြုပြီး ထပ်မပြုံးပါနဲ့တော့ သူငယ်ချင်းလေး... နာတာလျာ...

နေ့လည်စာ စားရင်း ချက်ချင်း နင့်ကို သတိရလာတယ် မာရီယာ...
နောက်ဆုံး ညစာ စားပြီးကတည်းက စိတ်ကောက်ထားကြတယ် နင်နဲ့ ငါ...
ဒါမယ့် ငယ်ဘ၀က စေ့စပ်ပြေငြိမ်းရေး ဂိမ်းကလေးများ...
ငါးပြေမလား... သက်သက်လား...
ပြီးခဲ့တာတွေ ထားလိုက်ပါတော့ မာရီယာ...
တကယ်မှာက တို့ နှစ်ယောက်ဟာ မောင်နှမတွေပဲ မဟုတ်လား...
အမြင်ကပ်မှု အမှတ်တံဆိပ်များကို
နင့် နံရံတွေပေါ်မှာ ငါ မချိတ်ဆွဲတော့ပါဘူး... မာရီယာ...
ငါ့ကို ခွင့်လွှတ်ပါ...

ဘာမှလည်း မဟုတ်ပါ...
စိတ်ညစ်စရာတွေ လာရင်...
နင့်ဂစ်တာသံ တိုးတိုးလေးနဲ့
နင့်သီချင်းအေးအေးလေးတွေကို တမ်းတနေမိရော မီရှဲလာ...

ဘာမှလည်း မဟုတ်ပါ...
စိတ်ညစ်စရာတွေ လာရင်...
နင့် ပျာယီးပျာယာအားလုံးနဲ့
နင့် အပြုံးလေးတွေကို တမ်းတနေမိရော နာတာလျာ...

ဘာမှလည်း မဟုတ်ပါ...
စိတ်ညစ်စရာတွေ လာရင်...
နင့် စာ ကဗျာတွေနဲ့
နင့်ရဲ့ ဂျစ်တီးဂျစ်ကန်
အငြင်းသန်တတ်တာလေးတွေကို တမ်းတနေမိရော မာရီယာ...

atn

Aug 31, 2011

Blog Day 2011 အမှတ်တရ

ကျနော် ဘလော့စရေးတော့ ၂၀၀၇ ခုနှစ် ဒီဇင်ဘာလ ၆ ရက်ပါ... ခု ဆို ၄ နှစ်နီးပါး ရှိပြီပေါ့...

ကိုယ့်ကိုယ်ကို ဘလော်ဂါတယောက်ပါ-လို့ ပြောနိုင်အောင်ကလည်း blogspot.com မှာ အကျွမ်းတ၀င် ဖြစ်နေခဲ့ပြီး post တွေ ရာကျော်အောင် ရေးပြီးမှသာ... ပြောရဲခဲ့တာပါ...

သို့သော်လည်း... မြန်မာ ဘလော့ဂါတွေ အကြောင်းကို ကျနော်က သိပ်မသိသူပါ... ဘာလို့ဆို.... ယေဘုယျ မြန်မာဘလော်ဂါတွေလို ကျနော်က ဘလော့-ဆိုတာကြီးကို တွေ့ဆုံ ဖက်တွယ် ချစ်ခင် ရင်းနှီး သံယောဇဉ်ကြီးခဲ့ရတာမျိုး မဟုတ်လို့ပါ...

တကယ်ဆို ၃ နှစ်ကျော် ဘလော့ဂင်းခဲ့ အပြီးမှာ... ကျနော် ဘာတွေရခဲ့လဲ-လို့... ကိုယ့်ဘာသာ ပြန်မေးခဲ့ဖူးပါတယ်...

ကျနော့် ဘလော့ကို ဘာဆုလဲမသိပေးမယ့် စာရင်းထဲထည့်တာ ကြုံဖူးပါတယ်... ကျနော် သွားပြောခဲ့တယ်... အဲသည်စာရင်းထဲက ကျနော့်ကို ဖယ်ပေးပါ-လို့...

ကျနော် ဘလော့ရေးတာ... ကျနော့်အတွက် ကျနော်ရေးတာပါ... (အင်း... အငြင်းအခုန်တွေ ဖြစ်မှာ စိုးလို့... ကျနော် ရေးခဲ့ဖူးသမျှ ဘလော့နဲ့ ပတ်သက်တဲ့ လင့်တွေကို နောက်ပိုင်းမှာ စာရင်း လုပ်ထားပေးပါ့မယ်...)

တခါတခါ စိတ်ကောင်းဝင်တဲ့အခါ... အကြည်ဓါတ်ကလေးတွေ ရွာတဲ့ ပို့စ်တွေ ကျနော် ရေးတယ်...

တခါတခါ အညှီဓါတ်တွေ ကျနော့် လက်ပေါ် နံဟောင်တဲ့အခါ... ဆဲစာတွေလည်း ကျနော်ရေးတယ်... (ခုတော့ ခင်ဗျားတို့တွေ မမြင်ရပါဘူး... ကျနော်က blogspot.com မှာ draft ပြန်လုပ်ထားလို့ပါ...း)

------------------------------------------------------------------------------------
ကျန်တဲ့... ဘလော်ဂါတွေတော့ ဘာလို့ ဘလော့ရေးကြလဲ.... မသိပါဘူး... ကျနော်ကတော့ ခံစားရလို့ ရေးပါတယ်... ရေးတိုင်းလည်း စိတ်ထဲရှိတာ ရေးပါတယ်... ကျနော့် ရေးတဲ့ စာတွေကြောင့်... ကျနော့်ကို... လူ အထင်ကြီးခြင်း သေးခြင်းကို စိတ်ထဲမှာကို မရှိတာပါ...
ကျနော့်ကို ဘလော့က စာတွေဖတ်ပြီး ချစ်တဲ့သူတယောက်က ကျနော် စိတ်နောက်နေတဲ့အခါ တကယ်ကြီး အနားမှာ လာအားပေးပါ့မလား... (နိုးဝေးလေ... ကျနော် သိတာပေါ့....း)

ခု ရေးနေတာကလည်း တကယ်တော့ ကျနော် ရေးချင်လို့ ရေးနေတာ မဟုတ်ဘူး... ကိုအောင့်ကြောင့်ပါ...

ကျနော့် ဘလော့မှာ ကျနော် စာတွေ မရေးတာ အတော်ကြာနေပါပြီ... ခုက ကိုအောင့်ကြောင့် ကြိုးစားရေးလိုက်တာပါ...
--------------------------------------------------------------------------------
ဘလော့နဲ့ ပတ်သက်သမျှ ကျနော် ရေးထားဖူးတာလေးတွေကို အောက်မှာ စာရင်းတို့ထားလိုက်ပါတယ်...
ဖတ်ချင်လည်း ဖတ်... မဖတ်ချင်လည်း ရပ်...

(၂) နှစ်ပြည့် အကြို မှတ်တမ်း


ဘလော့တထောင်၊ ဆောင်သင့်သည်များနဲ့ ရပ်တန့်သွားသောစာမျက်နှာများ



အဖြူရောင်တခုအတွက် ကျနော် ပြန်လာခဲ့တယ်


ရင်ထဲရှိတဲ့ မှတ်တမ်း

ပျောက်ဆုံးသွားသော ဥယာဉ်မှူးသို့

အနုပညာသမားများအကြောင်း တစေ့တစောင်း

တက်ဂ်လို့ရေးတဲ့စာ-၈ (သို့မဟုတ်) ကျနော်တွေ့ဖူးချင်သူများ

တက်ဂ်လို့ရေးတဲ့စာ-၅

တက်ဂ်လို့ရေးတဲ့စာ-၄

တက်ဂ်လို့ရေးတဲ့စာ-၁



ကံအကောင်းဆုံးလူတယောက်ရဲ့ဖွင့်ဟ ၀န်ခံချက်


ဘယ်သူ့ကိုမှ မတွေ့ချင်တော့ဘူး

ပြန်စီကြည့်မိသောခြေရာများ

အပြုံးကိုဆောင်ပြီး နှလုံးသားကို အလှဆင်ကြပါ


ကမ္ဘာထဲက ဘလော့။ ဘလော့ထဲက ကျနော်တို.


ဘ၀ဆိုတာ တိုတိုလေး ချိုအောင်နေကြ

အပြုံးကိုဆောင်ပြီး နှလုံးသားကို အလှဆင်ကြပါ

ကမ္ဘာထဲက ဘလော့။ ဘလော့ထဲက ကျနော်တို.

atn

Aug 23, 2011

သတိရတယ်... အင်ဒရီယာ...













မေ့လျော့ခြင်းနဲ့ပဲ သတိရနေမှုကို လှလှပပကြီးကို ထုဆစ်ခဲ့တယ်... အင်ဒရီယာ...
တို့ နှစ်ယောက်ကြားက အထီးကျန်နေမှုကို သိပ် မကျယ်လောင်နေစေနဲ့...
နေသာတဲ့ နေ့တွေမှာ ကျီးတွေ အာသလိုမျိုး... ဆူညံယောက်ယက်ခပ်နေအောင် လွမ်းခဲ့တယ်...
ဝေဒနာဆိုတဲ့ လက်ဆွဲခြင်းကို ညာဖက်လက်မှာ လေးလေးပင်ပင် ဒယဥ့်တိုက် ဆွဲလို့... တမ်းတခြင်းဈေးတန်းထဲ... ခေါင်းပေါက်အောင် ဒေါင်းတောက်ခဲ့ပါတယ်... အင်ဒရီယာ...
နင် ဘယ်မှာလဲ... နင် ဘယ်မှာလဲ... ဘိုဘိုဟန်-သီချင်းကို... ဟစ်...
ဈေး မဆစ်တော့ဘူး... အင်ဒရီယာ... ရရာ ဈေးနဲ့သာ ၀ယ်ပါရစေ...
ပျော်ရွှင်မှုများကိုသာ... ငါ့အား ရောင်းပါ့...
အဲသလို ပြဇာတ်ဆန်ဆန် စကားတွေ ပြောမယ်... အင်ဒရီယာ...
ပင်လယ်ရဲ့ အဆုံးကို... ရူးရူးနှမ်းနှမ်းနဲ့... မိုက်မိုက်ကန်းကန်း လိုက်ရှာနေမိတဲ့ မြစ်ဟာ... ငါပေါ့ ... အင်ဒရီယာ...
ဒေ၀ါလီ ခံတော့မယ့် သစ်ခွတွေကိုမှ...
ကြွေးဟောင်းဆပ်နေရတဲ့ အထီးကျန်ဥယာဉ်ကြီးထဲမှာ ... လှလှပပကြီးကို ပျိုးမိတာ.... ငါ့မိုက်မဲမှုပါလို့....
လူမိုက်ကြီး တချို့... တီးတိုး အတင်းအဖျင်း... သတင်းစာရှင်းလင်းပွဲ .... လုပ်ကြလေဦးမလား...
ဘယ်လိုပဲ ဖြစ်ဖြစ်... ဖိနပ်စီးမထားတဲ့ အချစ်ဟာ
လက်ဝှေ့ကြိုးဝိုင်းထဲမှာ.... နင့် ရီးစားဟောင်းတွေနဲ့ ရန်ဖြစ်တယ်... အင်ဒရီယာ..
မနေ့ညက သောက်ခဲ့မိတဲ့ ၀ိုင်တွေဟာ.... အဆိပ်တွေလို မချိုဘူးလို့...
ရွှေတိဂုံဘုရားရဲ့ အင်္ဂါထောင့်တိုင်းမှာ.... မူးမူးရူးရူးနဲ့.... ရေရွတ် ရေးထိုးမယ်...
အကုသိုလ်တွေ အထပ်ထပ် တိုးလည်း.... ငါက မမှုတော့...
ပြီးတော့.... ငါ့ အခန်းနံရံတွေမှာ..... ရန်သူစာရင်းကို... အကြွေးစာရင်းတွေလိုမျိုး.... ကပ်ထားမယ်... အင်ဒရီယာ..
အမှတ်တရတွေကို ... အမှုမဲ့ အမှတ်မဲ့လိုလို .... မှတ်မှတ်ရရ တမင်တကာ ရည်ရွယ်ချက်ရှိရှိ
အစီအစဉ်တကျ မေ့လျော့နေရတာကိုကလည်း.....
အမေ့ အိမ်ပေါ်ကနေ..... အမြင်ကပ်ကပ်နဲ့..... အဖေက ကန်ချလို့..... ခေါင်းနဲ့ ဆင်းရသလိုမျိုး....
ကိုးယိုးကားယားနိုင်တယ်... အင်ဒရီယာ..
အ၀တ်တထည် ကိုယ်တခုနဲ့ လမ်းမပေါ်မှာ.... ကဗျာဆန်ဆန် မျက်နှာငယ်နေလိုက်ရပုံများ... အင်ဒရီယာရယ်...
လုပ်ချင်တာတွေကို လုပ်ပြီးသွားတဲ့..... ပျားရေဓါးသွားပေါ်မှာ
မလုပ်ချင်တာတွေကိုလည်း..... ဘယ်တော့မှ..... ငါ မလုပ်ဘူး... အင်ဒရီယာ...
လိမ်လိမ်မာမာ မိုက်မဲနေသူဟာ... ဟောသည့် ကမ္ဘာကြီးမှာ..... ငါတယောက်တည်း ရှိရဲ့...
ဓါးသွားထက်က ပျားရည်စက်ကို.... ငါ လျက်မယ် ထင်သလား...
ဒဏ်ရာရထားတဲ့ ခြင်္သေ့တကောင်လိုပဲ..... ငါ့အနာတွေကို.... ငါ့လျှာနဲ့ ငါလျက်မယ်... အင်ဒရီယာ...
ခုညတော့.... အပြာရောင် ဒိန်ခဲ တချပ်ကို ..... အမှုမဲ့အမှတ်မဲ့ ပါးပါးလှီးစား...
ပြီးတော့မှ... ငါ သတိရမိသွားတာ နင်ပေ့ါ... အင်ဒရီယာ...
နင်သာ....
ငါ့ရဲ့ အလှအပဆုံး အနက်ရှိုင်းဆုံး ဒဏ်ရာ..
အင်ဒရီယာ...

atn

Aug 16, 2011

ပြဇာတ်




















ဇာတ်ညွှန်း လွဲ... သရုပ်ဆောင် ညံ့... ဒါရိုက်တာ အရူး...
မြေပုံကျပျောက်... ဘယ်ဘူတာ ဆိုက်မလဲ... အမေးအမြန်း မထူနဲ့... သံလိုက်အိမ်မြောင်တခု ဆောင်ထားမှ...
လမ်းဆုံးရင်း ရွာတွေ့... (သေရွာ)... သေပြီ-ဆရာပဲ...
ကိုယ့်မြင်းနဲ့... ကိုစိုင်းနဲ့... (လက်တွေလည်း လေထဲကို မြှောက်လို့)...
ရွာရိုး ကိုးပေါက်ပဲ ရှိသေး... ဆယ်ပေါက်ပြည့်အောင်... အင်း... ...
ကိုယ့်လှေနဲ့.... ကိုယ် ထိုး... (ကိုယ့်မျက်နှာကို ကိုယ့်လက်သီးနဲ့ ...) ....
ခရီး မဆုံးခင် လှည့်ပြန်လား... ပြန်ရဲ့...
မှတ်တိုင် မရောက်ခင် ဆင်းလို ဆင်းလား... ဆင်းရဲ့...
(မသာ) ရထား စီးပြီး ဘူတာပျောက်သလား... ပျောက်ရဲ့...
ကြယ်ကြည့်ပြီး ရွက်လွှင့်မိတဲ့ပင်လယ်... ကြယ်တွေထက်ကို ကျယ်နေပါပေါ့...
မှတ်ပြီလား... ဟင်... ... ပင်လယ်ကို ရှာမယ်ဆို... ခုတော့ ဘာတတ်နိုင်သေးလဲ... (အန္ဓ... ... )...
ရေဒီယိုထဲက... ခဏခဏ လာလာနေတဲ့ ရော့ခ်သီချင်းလို...
ဘ၀က ဘေ့စ်သံတွေ တဒုန်းဒုန်းနဲ့...
အုံးအုံးကြွက်ကြွက်ကြီးကို... တက်တက်စင်တွေ လွဲလို့...
လေကလေး ဘာလေး ချွန်လိုက်ပါဦးလား... (ကိုယ်တော်... ...)
မချွန်တတ်ရင်လည်း ခဲတံတွေ ဘာတွေ... ချွန်... (သားတော်... ... )
ရွပ်ရွပ်ချွံချွံ ဆုံးရှုံး လွဲမှားမှုများကို... တရားပြဖို့တော့...
ဘယ်သောအခါမှ မကြိုးစားလေနဲ့... (ခမည်းတော်... ...)
ဘုရားကျောင်းကို မျက်စောင်း ချွန်ချွန်နဲ့ အချက် နှစ်ဆယ်လောက် ထိုးပစ်ခဲ့တယ်...
သောက်မြင်ကပ်မှုပါ... တခြား ဘာအကြောင်းမှ မရှိပါ ... (အာမင်... )
သည်နေ့ကတော့ သမိုင်းတင်မယ့်နေ့...
(အရှေ့ကနေ နေထွက်တယ် ဂျီးဒေါ်ရေ့... ဘယ်လိုလုပ်ကြမလဲ... ကျုပ်တို့ ကမ္ဘာကြီးမှာ... )
ကျူးကျော်ရပ်ကွက်ဈေးထဲမှာ နားစွန် နားဖျား ကြားမိတာလေးပါ...
ကျုပ်လည်း ဘုရားမှာ ဂုဏ်တော် ကိုးပါးကို ပုတီး စိတ်ဦးမှ ဖြစ်မှာပါ...
(လူတကာ ကြားအောင် ကျယ်လောင်စွာ ပြောရင်း...
လက်ထဲမှ အပြာစာအုပ်ကို ခပ်အုပ်အုပ်ကလေး ဖွက်ကာ...
တပ်ထောင်တာ ဗိုလ်ထုရှေ့မှာ ဗိုလ်ရှုသဘင်ခံသော မျက်နှာဖြင့်...
ခေါင်းကိုမော့လျက်... လူအများ ရှေ့မှ... ၀င့်ကြွားစွာ...
တလှမ်းချင်း ထွက်ခွာသွားရင်း
ကိုယ့် ပုဆိုးစ ကိုယ်နင်းကာ ချော်လဲစေ...)
ဤတွင်...
တခန်းရပ်ပြဇာတ် ပွဲပျက်၏... ...

atn

Aug 13, 2011

မဟင်္သာ ဖတ်ဖို့ စာ...





















တခါတခါ စဉ်းစားကြည့်ဖူးရဲ့လား... မဟင်္သာ... အဲသည်လို ပါးပါးလေးနဲ့ ဖြည်းဖြည်းလေး ဖြာကျလာနေတဲ့ မနက်ခင်း နေရောင် ၀ါဝါကလေးထဲမှာ မဟင်္သာအတွက် ကျနော့် အလွမ်း အစအနတွေ ဘယ်လောက် အတိုင်းအဆအထိ ပျော်ဝင်နေသလဲဆိုတာ... သိပါသလား မဟင်္သာ... ကျနော့်မှာတော့ ရှိရှိသမျှ အရာတွေအားလုံးကို စိတ်တန်ခိုးအစွမ်းနဲ့ အလွမ်းတွေပဲ တပ်ဆင်နေမိပေါ့ မဟင်္သာ...
သည်မှာ... မဟင်္သာ... ဟိုးတနေ့ကလည်း မဟင်္သာရဲ့ အသံစွာစွာကလေးတွေကို ကျနော် ထည့်သိုသိမ်းဆည်းပွေ့ပိုက်ထားခဲ့မိတဲ့ စုဗူးအပြာရောင်ကလေးဟာ သစ်ခွ အပြာတပွင့်လို ပွင့်တယ်... နိုင်လွန်ကြိုးတပ် ဂစ်တာတလက်ကနေ ဂီတသံတွေ လွင့်လာသလိုပ...
ကျနော့် ပြူတင်းတံခါးကို ဖွင့်လိုက်မိတဲ့ အခါတိုင်း ရှိရှိသမျှ အရာအားလုံးဟာ မဟင်္သာကို သတိရနေစေတယ်... နှင်တံ တခုခုနဲ့များ တယုတယ တို့ပြုထားလေရော့သလား မဟင်္သာ... လေရိုင်းတို့ ကခုန်ရာ... အဲသည်ကွင်းပြင်ထဲမှာကို ကျနော့်ကို ပြုစားလိုက်ပါ့ မဟင်္သာ... သံသရာ တခုလုံး မဟင်္သာအနားမှာ ပြုံးပြီး ကျနော် ပျော်ရွှင်နေပါ့မယ်... ကျနော့် ပန်းခင်းလေးထဲမှာ အနမ်းပန်းတပွင့် မဟင်္သာအတွက် ပွင့်နေခဲ့ပြီ... ခူးဆွတ်ပါ့.. ဆင်မြန်းပါ့... ပန်ဆင်ပါ့... ယုယပါ့... နွေးထွေးပါ့... မဟင်္သာ... နေ့တွေ ညတွေကို ကျနော် မသိတော့ဘူး... ကျနော် သိတာ မဟင်္သာကို ချစ်တာပဲ သိတယ်... မဟင်္သာရှေ့မှာ ကျနော် ဒူးတုပ်တဲ့အခါ အချစ်တွေနဲ့ ကျနော့်ကို ချုပ်နှောင်လိုက်ပါ မဟင်္သာ... သတိရလာတဲ့အခါတိုင်း ဟင်္သာ-ဆိုတဲ့ စာလုံးကို ကျနော် တခါစီ တခါစီ ရေးမယ်... ကျနော့်ကို မဟင်္သာရဲ့ အပြုံးကလေးတွေကိုပဲ စာအုပ် တအုပ်အဖြစ် ပေးပါ့ ... အဲသည် စာအုပ်ကလေးကို မဟင်္သာ ဖွင့်လိုက်တိုင်း စမ်းချောင်းလေး တခု စီးထွက်လာမယ်... ကျနော် အာမခံတယ် မဟင်္သာ...

atn

Aug 10, 2011

မျိုးဆက်၊ ဗိုလ်မုန်တိုင်းနှင့် အချေအတင်
















မုန်တိုင်းတိုက်နေပြီဆိုတာ ကျနော်သိတာပေါ့... ဗိုလ်မုန်တိုင်း...
မုန်တိုင်းတိုက်နေတဲ့ ဘ၀ထဲမှာ ကျနော့် အဖိုးက အိမ်ထောင်ရက်သားကို မုန်တိုင်း တိုက်သလို ကျ...
နောက်မုန်တိုင်းတစင်းဖြစ်လာရမယ့် ကျနော့်အဖေကို မုန်တိုင်းတွေလို ကျနော့် အဖွားအား မွေးဖွားကြီးပြင်းစေခဲ့တယ်...

မုန်တိုင်းတိုက်နေပြီဆိုတာ ကျနော်သိတာပေါ့... ဗိုလ်မုန်တိုင်း...
မုန်တိုင်းတိုက်နေတဲ့ ဘ၀ထဲမှာ ကျနော့် အဖေက အိမ်ထောင်ရက်သားကို မုန်တိုင်း တိုက်သလို ကျ...
နောက်မုန်တိုင်းတစင်းဖြစ်လာရမယ့် ကျနော့်ကို မုန်တိုင်းတွေလို ကျနော့် အမေအား မွေးဖွားကြီးပြင်းစေခဲ့တယ်...

မုန်တိုင်းတိုက်နေပြီဆိုတာ ကျနော်သိတာပေါ့... ဗိုလ်မုန်တိုင်း...
မုန်တိုင်းတိုက်နေတဲ့ ဘ၀ထဲမှာ ကျနော်ကိုယ်တိုင်က အိမ်ထောင်ရက်သားကို မုန်တိုင်း တိုက်သလို ကျ...
နောက်မုန်တိုင်းတစင်းဖြစ်လာရမယ့် ကျနော့်သားကို မုန်တိုင်းတွေလို ကျနော့် မဟေသီအား မွေးဖွားကြီးပြင်းစေခဲ့တယ်...

မုန်တိုင်းတိုက်နေပြီဆိုတာ ကျနော်သိတာပေါ့... ဗိုလ်မုန်တိုင်း...
မုန်တိုင်းတိုက်နေတဲ့ ဘ၀ထဲမှာ ကျနော့် သားက အိမ်ထောင်ရက်သားကို မုန်တိုင်း တိုက်သလို မကျစေချင်တော့ဘူး...
နောက်မုန်တိုင်းတစင်းဖြစ်လာနိုင်မယ့် ကျနော့်မြေးကို မုန်တိုင်းတွေလို ကျနော် မမွေးဖွားစေချင်တော့ဘူး... ဗိုလ်မုန်တိုင်း...

ကျနော့် မြေးကလေး
လေနုအေးဖြစ်ပါရစေ... ဗိုလ်မုန်တိုင်း....

atn

Aug 4, 2011

သွားကြပါစို့... အင်ဒရီယာ...





















သွားကြမယ် အင်ဒရီယာ...
အဲသည်မှာ နေသာတယ်...
ငါ ကြိုက်တတ်တဲ့ ကမ်းခြေ...
သဲသောင်တွေက ပြန့်စင်းဖြူလွလို့...
ဘ၀ဆိုတာကို လွတ်လပ်ခြင်း ကွင်းပြင်မှာ စိတ်ကြိုက် ဖြန့်ခင်းလိုက်ကြမယ်...
ကောင်းကင်ပြာကို မျက်နှာချင်းဆိုင်ဖို့
သဲပြင်ပေါ် အတူ ကျောချရင်း ခဏလောက် အိပ်ကြပါစို့... အင်ဒရီယာ...

သွားကြမယ် အင်ဒရီယာ...
အဲသည်မှာ လထွက်တယ်...
မနက်ခင်းနေကို... လတစင်းနဲ့ အတူ... တွေ့...  တွေ့... နေ...  နေရတဲ့... နေရာ...
နေရယ်... လရယ်... ဘယ်တော့မှ မဆုံဘူးလို့... ဘယ်သူ ပြောသလဲ...
နင်ရယ်... ငါရယ်... အဲသည်နေရာမှာ အတူဆုံကြမယ်... အင်ဒရီယာ...
တို့ နှစ်ယောက် မဆုံနိုင်ပါဘူးလို့... ဘယ်သူ ပြောဦးမလဲ...

သွားကြမယ် အင်ဒရီယာ...
အဲသည်မှာ ပန်းတွေပွင့်တယ်...
အပြာရောင် သစ်ခွတပွင့်ကို နင့်အတွက် ငါ ခူးဆွတ်မယ့် နေရာ...
ငါ့ အချစ်တွေကို ပန်းလို နင် မပန်တတ်သည့်တိုင်...
သစ်ခွအပြာလေး တပွင့်ကိုတော့ ငါ့အချစ်တွေကိုယ်စား
နင့် လည်မှာ ဆွဲထားမယ် မဟုတ်လား... အင်ဒရီယာ...

သွားကြမယ် အင်ဒရီယာ...
အဲသည်မှာ... ...
အဲသည်မှာ...
အင်ဒရီယာရယ်...
atn

Aug 2, 2011

လက်နက်ချပါ... အင်ဒရီယာ...





















အဲသည် လေထု အနီရောင်ထဲမှာ...
ရုတ်ရုတ်သည်းသည်းနဲ့...
အုပ်ဖွဲ့ပျံသန်းလာတဲ့ ဒေါသငှက်တွေဟာ...
အရွဲ့တိုက်ခြင်း အရှိန်အဟုန်...
မိုင်တရာ့နှစ်ဆယ် ကျော်ကုန်ပြီလား... အင်ဒရီယာ...

အတ္တငွေ့ရည် ဖိသိုသိပ်သည်းမှု အတိုင်းအဆ ကြီးမားလာတဲ့အခါ...
နားလည်မှု မော်လီကျူးများ အရူးအမူး ပြိုကွဲကြ... ရ... ရှာ... လေ... သလား...

ငါ့ မာနရေတံခွန်လေးတခု အေးခဲသွားတာ...
ငါကိုယ်တိုင် မြင်လိုက်တယ်... အင်ဒရီယာ...

စိတ်ချပါ..
ငါဟာ...
တောင် မပြိုချင်သူပါ... မိုး မပြိုချင်သူပါ... မြေ မပြိုချင်သူပါ... အင်ဒရီယာ...
နေကွယ်... လကွယ်... အမြင်ကွယ်... တခြုံကွယ်...
အဲသလို စာရင်းများထဲကနေ ငါ့အမည်ကိုသာ ဖယ်ရှားပစ်လိုက်ပါ... အင်ဒရီယာ..

သည်မှာ... တခုပြောပါရစေ... အင်ဒရီယာ...
ရှင်းလင်းနေရတာ အမြဲတမ်းမို့... ငါ့အခန်းက သန့်ရှင်းတောက်ပြောင်နေ...
ဘယ်သူ တစုံတယောက်အတွက်-လို့... မင်းထင်လေသလဲ... အင်ဒရီယာ...

ငါ့ အတောင်ပံတွေကို စီးနင်းလို့... မနက်ဖန်တွေ ပျံသန်းလာနေဆဲမှာ...
ခိုကိုးရာမဲ့နေမြဲ တ၀ဲဝဲလည်နေတဲ့ ညတွေ...
ပိန်းပိတ်အောင်မှောင်နေတဲ့ မာနနေရောင်ထဲ ပြိုကွဲကြေမွသွားရရှာတယ်...
ဒါဟာ နောက်ဆုံး စာမျက်နှာလား... အင်ဒရီယာ...

နောက်တနေ့ နိုးထလာတဲ့ မင့် နံနက်ခင်းမှာ...
မင်းအတွေးထဲ ပထမဆုံး ၀င်ရောက်လာသူဟာ...
ငါပါ-ဆိုရင်
ငါ့ရင်ခွင်ထဲမှာ
မင်း လက်နက်ချလိုက်ပါတော့... အင်ဒရီယာ...

ငါကတော့
မင်းခြေရင်းမှာ လက်နက်ချပြီးသား...

atn

Aug 1, 2011

ကမ်းခြေည...















ဘာ တခုကိုမှ... လေးလေးနက်နက်... သိပ် မစဉ်းစားတဲ့... ဂမူးရှူးထိုး တိမ်တိုက်တွေ...
တဦးကို တဦး... ဒုံးစိုင်း ပြေးလိုက်နေတဲ့ ညနေ...

အခုလောလောဆယ်ဆယ်တော့...
ကျနော့် လေပြေညင်းလေးနဲ့ ကျနော်... အဆင်ပြေပါတယ် မေမေ...
ညနေခင်းကို ကျနော် အသာအယာ ကျောသပ်ထားတယ်...

ကျနော့်ရင်ဘတ်ကို ကန့်လန့်ဖြတ်တိုက်လာတဲ့ ပင်လယ်လေဟာ... ဆားငွေ့တွေ သင်းနေတယ်...
ဒင်းတို့ရဲ့ ဆိုဒီယမ်နဲ့ ကလိုရင်း စုံတွဲကို... ကျနော် အမြဲ မုန်းတယ် မေမေ...

လက်တွဲပြီး လျှောက်လှမ်းမယ့်သူမပါတဲ့ ကျနော့် ကမ်းခြေဟာ...
အထီးကျန် အလွမ်းတွေနဲ့...
ဆုနာမိ... လှိုင်းတွေ... လွှမ်းသွားတဲ့ မြို့ပါပဲ...
သိစိတ်တွေ... မသိစိတ်တွေဟာ... တုံးလုံးပက်လက် လဲပြိုလို့...

ဟောဟို... အုန်းပင် ကောက်ကွေးလေး အနောက်မှာ...
တယောက်ထဲ တိတ်တဆိတ် ရပ်... နေ... နေတာ....
ကျနော့် လမင်းကလေးပါ မေမေ...
အဲသည် အုန်းလက်အဖျားကလေးများမှာ...
သူ့ကို ချိတ်ဆွဲထားခွင့်... ကျနော့်ကို ပေးပါ့...

ကြယ်ကလေးတချို့ .. သက်ပြင်းချသံ ရှည်လျားတယ်...
ကျနော်တို့အားလုံး မတတ်နိုင်တာတွေလည်း ရှိနေတာကိုး... မေမေ...

ည-ဆိုတာကိုက
နေမင်းကြီး ကွယ်ပျောက်သွားမှ
ပင်လယ်ဝမှာ ပေါ်ပေါက်လာရတာ မဟုတ်လား...


atn

Jul 28, 2011

နှစ်ဆယ့် သုံးနှစ်တောင် ရှိခဲ့ပြီကော နှင်းရေ့...


ကိုယ်ပိုင် ကားက မရှိတော့ပြီဆိုတော့ကာ ဘယ်သွားသွား... နီးရင် လမ်းလျှောက်... ဝေးရင် ဘတ်စ် စီး... သည်လိုနဲ့ပဲ ဘ၀ခရီး ဆက်နေရသပေါ့လေ...း) သည်နေ့တော့ ရှေ့လာမယ့် တပတ်စာအတွက် စားဖို့ သောက်ဖို့တွေကို လမ်းလျှောက်ပြီး သွားဝယ်ရတယ်... တော်ပါသးတယ် SafeWay ဆိုတဲ့ စတိုးတခုက အနားမှာ ရှိလို့... အရင်ကတော့ အလုပ်က ပြန်လာတိုင်း အဲမှာ ဆင်းဆင်းပြီး ၀ယ်ဖြစ်တယ်... ကြာလာတော့ ခဏခဏ မ၀ယ်ချင်တော့တာနဲ့ တပတ်စာ တခါတည်း ၀ယ်မယ်ဆိုပြီး ၀ယ်မိပါရော... ပြီးတော့မှ ကျွတ်ကျွတ်အိပ်ပေါင်းစုံနဲ့ ကိုးယိုးကားယားကြီးဖြစ်လို့... စိတ်ညစ်သွားတယ်... ခုတော့ ပစ္စည်းတွေကို အများကြီးလည်း မသယ်နိုင်... ခဏခဏလည်း မ၀ယ်နိုင်... သည်တော့ သည် တပတ်အတွက်ကတော့ သယ်နိုင်သလောက် ၀ယ်ပြီး ကျောပိုးအိတ်နဲ့ တချို့ထည့် တချို့ကို လက်ကဆွဲ... အိမ်ပြန်ရောက်တော့ လျှာထွက်နေပြီ... အလေးအပင်တွေ မသယ်မပိုးတာကလည်း ၁၅ နှစ်လောက်ရှိပြီဆိုတော့... လက်တွေနာ... ပုခုံးတွေနာနဲ့... ခဏထိုင်နားနေရင်း... ဟိုးလွန်ခဲ့တဲ့ အနှစ် ၂၀ ကျော်က... အဲလို လက်တွေနာ ပုခုံးတွေနာခဲ့ဖူးတဲ့ နေ့ တရက်ကို... ပြန် သတိရသွားမှ... ထခုန်မိမတတ် ဖြစ်သွားတယ်...

ကြည့်စမ်း ၂၃ နှစ်တောင် ရှိခဲ့ပါပကောလား...
ဟုတ်တယ်...
ရှေ့လ ၈ ရက်ဆို ၂၃ နှစ် ပြည့်ပြီပေါ့... နှင်း...

အထူး စစ်သင်တန်း တခုကို တက်နေချိန်တုန်းကပါ... တနေ့တော့ တခြား ရဲဘော် တဦးနဲ့ အတူ မနက် ၂ နာရီကနေ ၄ နာရီ ကင်းရှည် တာဝန်ကျတယ်... အိပ်လို့ကောင်းနေတုန်း အချိန်ကြီး... မနက် ၁ နာရီ ၄၀ လောက်မှာ... ကင်းမှူးက လာနှိုးပြီး ကင်းချိန်းဖို့ လွှတ်လိုက်တယ်... သင်တန်းကလည်း တက်နေတုန်းဆိုတော့... မနက် ၅ နာရီ ကနေ ညနေ ၆ နာရီ တန်းဖြုတ်ချိန်ထိ... တနေကုန် ပြေးလွှားလှုပ်ရှားထားတဲ့ ခန္ဓာကိုယ်ဟာ... ဘယ်လိုနေမလဲ-စဉ်းစားသာကြည့်... အိပ်ရေးကလည်း မ၀... ခန္ဓာကိုယ်တခုလုံးကလည်း လေးလံနာကျင်ကိုက်ခဲ... ကင်းထိုင်တဲ့ ကတုပ်ကျင်းထဲရောက်တော့ ဇန်န၀ါရီနှင်းတွေကလဲ သည်းလို့... ဘာပြောကောင်းမလဲ... ကင်းအတူကျတဲ့ ရဲဘော်နဲ့... ၂ ယောက် အတူ စက်တော် ခေါ်ပစ်လိုက်ကြတာ... နောက်ကင်းချိန်းနဲ့ လိုက်လာတဲ့ ကင်းမှူး အတင်းလှုပ်နှိုးမှ မျက်စေ့ ပွင့်ကြတော့တယ်... စဉ်းစားသာ ကြည့်ပေတော့... မနက်မိုးလင်း ကင်းရှည်ဟာ... စစ်ရေးမှာ အရေးအကြီးဆုံး... ရန်သူသာ ဆိုရင် ကိုယ်တို့ ၂ ယောက်ကို နှစ်ခေါင်း ညှစ်ပြီး သတ်သွားလောက်ပြီ...း)) ကင်းမှူးကတော့ ပြစ်ဒဏ်ကျ စာရင်းထဲ ထည့်လိုက်တယ်... ညနေ တန်းဖြုတ်မှ ပြစ်ဒဏ် ခံရမယ်-ဆိုတော့ တော်ပါသေးရဲ့လို့ တွေးနေမိတယ်...း) ကင်းလဲတော့ မနက် ၄ နာရီ တန်းစီချိန်က မနက် ၅ နာရီ ဆိုတော့... ပြန်အိပ်လို့ကလည်း မဖြစ်တော့ဘူး-ဆိုပြီး စစ်ရေးပြကွင်းနားမှာ ဆေးလိပ်ထိုင်သောက်... ထုံးစံအတိုင်း ပေါက်ကရ ရီစရာတွေ ပြော... ဟော... နောက်တော့... မနက် ၅ နာရီ တန်းစီ... ပီတီ ပြေး... စစ်ရေးပြ... လက်နက်ငယ်... လက်နက်ကြီး... ဖောက်ခွဲရေး... မြေပုံ... မဟာဗျူဟာ... နည်းဗျူဟာ... တောတွင်း ရှင်သန်ရေး... အရေးပေါ်သူနာပြု... အို... စုံတကာ့ကို စုံလို့... ညနေ ၆ နာရီ တန်းဖြုတ်ချိန်ကုန်တော့... မနက်က ကင်းအိပ်တဲ့ ကိုယ်တို့ ၂ ယောက်ကို... ကင်းမှူးက တာဝန်မှူး လက်ထဲ အပ်လိုက်ပါတယ်... (နေရောင် တောင်စွယ်မှာကွယ်ပြီလေ... ကိုယ်တို့ ၂ ယောက် အားငယ်နေကြပုံများ... ညည်းကို ပြချင်တယ်... နှင်း...း))

(လာခဲ့ကြ... ကာလနဂါးကြီးများ...)- ဆိုတဲ့ တာဝန်မှူးကြီးရဲ့စကားကို ကိုယ်တို့ ၂ ယောက်က စပ်ဖြီးဖြီးကြီးတွေ ရီမိကြပါတယ်... (မင်းတို့ ၂ ကောင်ကို... ဒဏ်မပေးပါဘူး... စစ်ကြောင်းက လက်ဆောင် ၃ ခုစီပဲ ပေးမှာပါ... ဒါပေမယ့် ခု ငါ့ လက်ဆောင်လေးတခုတော့ ပေးပါရစေဦး...)-ဆိုတာနဲ့ (ဟုတ်... ဗိုလ်ကြီး...) - ပါပေါ့ ၂ ယောက် ပြိုင်တူ အော်နေတုန်း... ဗြုံးဆို တယောက်တချက်စီ အလစ် ဇက်ပိုးအုပ်တာ ခံလိုက်ရတယ်... လူတွေလည်း ပူထူသွား... (ခု ဇက်ပိုးအုပ်လိုက်သလိုပဲ... စစ်မှာ အလစ်အငိုက် ဆိုတာ ရှိတယ်... မင်းတို့ထိုင်တဲ့ ကင်းရှည်ဟာ စစ်မှာ လက်ဦးမှုယူပြီး အလစ်အငိုက် တိုက်တဲ့ အချိန်... ဒါဟာ သင်တန်းပေမယ့် လက်တွေ့ စစ်မြေပြင်လို လေးလေးနက်နက် တာဝန်ယူအောင် လေ့ကျင့်ပေးနေတာ... စစ်မြေပြင်မှာ မင်းတို့ ကင်းအိပ်နေလို့ ရှိရင် ရန်သူကအလွယ်တကူ သတ်သွားမယ်... ထိုးထားတဲ့ ကင်းရှည်ကို ရန်သူက ရှင်းပြီးမှတော့ စစ်ကြောင်းတကြောင်းလုံးကို အလစ်အငိုက် ရသွားပြီဆိုတော့ မင်းတို့ရဲ့ ကင်းအိပ်မှုဟာ တာဝန် ဘယ်လောက် ပေါ့လျော့သလဲ ဆိုတာ စဉ်းစားကြည့်ကြစမ်း... ) ဆိုတဲ့ သူ့စကားနောက်မှာ... (ဟုတ်.... ဗိုလ်ကြီး...) လို့ ပြောတဲ့ ကိုယ်တို့ ၂ ယောက်ကို ကျောပိုးအိတ် တလုံး... လက်ဆွဲ သံသေတ္တာ ၂ လုံးစီ ပေးပါတယ်... ပြစ်ဒဏ်က သိပ် မခက်ပါဘူး... အဲသည် ကျောပိုးအိတ်ကလေးကိုလွယ်... သံသေတ္တာလေး ၂ လုံးကို ဆွဲပြီး စစ်ရေးပြကွင်းကို ၁၅ မိနစ် ပတ်ပြေးရမှာပါ...း)))

ဒါနဲ့ ကျောပိုးအိတ်ကလေးကို ကောက်မလိုက်တော့... ဒင်းက တော်ရုံနဲ့ ကြွပါမလာဘူး... ဒါနဲ့ ကျောပိုးအိတ်အဖုံးလေး အသာလှပ်ကြည့်လိုက်တော့ အထဲမှာ သဲတွေအပြည့်ဗျား...း(
တတ်နိုင်ဘူးလေ... ကင်းအိတ်ထားမိမှတော့ လွယ်ရတော့မှာပေါ့ဆိုပြီး အတွင်းအားအကုန်သုံးပြီးမလို့ လွှဲလွယ်ပစ်လိုက်တော့ ကျောပေါ်ရောက်သွားတယ်... ပုခုံး ၂ ဖက်ကတော့ အိ-ကနဲ ကျသွားလေရဲ့...

ဒါနဲ့ နောက် သံပုံးလေးတခုကို အသာမကြည့်တော့ အဲသည့် ဘသားချောကလည်း မကြွဘူး... ဒါနဲ့ အဖုံးဖွင့်ကြည့်လိုက်တော့ အထဲမှာ ၇.၆၂ မမ စက်လတ်ကျည်တွဲက သေတ္တာ အပြည့်...း( အဲကျည်တွဲလေးတွေ သံသေတ္တာထဲ ယှဉ်တွဲ အိပ်နေကြပုံက မိခင်နဲ့ ကလေး ဆေးရုံမှာ မွေးကာစ ကလေးလေးတွေ တန်းစီ အိပ်နေကြသလိုမျိုးလေး... သူတို့ ဘာမှ အပြစ် မရှိသလိုလို... သူတို့က မပေါက်ကွဲ တတ် သလိုလို... လူမသတ်တတ်သလိုလို... (ကြုံတုန်း ကဗျာဆန်ဆန်တွေးကြည့်မိရင်း...) အင်း...
ငါတော့ ဘ၀ပျက်ပြီလို့... စိတ်ထဲ စဉ်းစားပြီး ကိုယ့်ကိုယ်ကို သနားလိုက်မိတာ အော်တောင် ငိုချင်တယ်...

(အိုး... ပျက်လက်စနဲ့တော့ မထူးပါဘူး...) လို့ တွေးပြီး နောက် သံသေတ္တာ တလုံးကို ဖွင့်ကြည့်တော့... အထဲမှာ နာနတ်သီးတွေရော... ပန်းသီးတွေရော... မင်းဂွတ်သီးတွေရော... သံပုရာသီးတွေရော... စုံတကာ့ကို နှံ့လို့... Produce Department တွေက လုပ်တတ်တဲ့... Fruit Medley တွေ ကျနေတာပဲ...း)) (စားဖို့ သစ်သီးတွေ မဟုတ်ဘူးနော်... လက်ပစ်ဗုံးတွေ... အရွယ်စုံ... အမျိုးအစားစုံ... ) ကဲ... သေရောဗျာ... သည်တခါမှ ကိုယ်မသေရင် နောက် ဘယ်တော့မှ သေဖြစ်မှာ မဟုတ်ဘူး...
ကင်းအတူ အိပ်တဲ့ ရဲဘော်ကိုကြည့်လိုက်တော့လည်း မျက်နှာလေး ရှုံ့မဲ့လို့... သူ့ ပုံးထဲမလဲ ကိုယ်နဲ့ သိပ်ကွာပုံမရပါဘူး...

ကဲ... ၀ီစီသံ စကြားတာနဲ့ ကျောပိုးအိတ်တနင့်တပိုးကြီးကို လွယ်ထားတဲ့ ကိုယ်ခန္ဓာက လက်နှစ်ဖက်နဲ့ သံပုံး ၂ ပုံးကို စမလိုက်တာနဲ့ လူတကိုယ်လုံးက ကိုင်း ညွှတ်ကျသွားတော့တာ... ဟိုအကောင်တွေနဲ့တောင် တူသွားမယ် ထင်တယ်... (လမ်းလျှောက်ရင် ခြေထောက်နဲ့ လျှောက်ပေမယ့်... ကိုယ်ခန္ဓာက ကိုင်းကိုင်း... အကောင်က မဲမဲ... လက် ၂ ဖက်ကလည်း မြေကြီးကို လက်ခုံနဲ့ ထောက်ထောက် ထားတတ်တဲ့ အကောင်ကွာ... ကိုယ် မေ့နေလို့... သူ့နံမည်က... ချန်ပီယံ-ဆိုလား ဘာလား...း))

ထားပါတော့... အဲသလိုနဲ့ ၂ ယောက်သား ပြေးကြရတော့တာပဲ... တာဝန်မှူးကလည်း တချိန်လုံး ၀ီစီ တရွှီးရွှီး မှုတ်ပြီး အားပေးနေသေးတယ်...း((
အမှန်က ကိုယ်တွေက ပြေးနေတာမဟုတ်ဘူး... စစ်ရေးပြကွင်းက သဲတွေကို ခြေထောက် ၂ ချောင်းနဲ့ ယက်ထုတ်ပြီး ရှေ့ကို သွားနေရတာ... ယက်ကန်ယက်ကန်နဲ့ ပြေးသလိုဖြစ်နေရတာ... ၁၅ မိနစ် ပြည့်သွားတော့... မျက်လုံးတွေလည်း ပြာနေပြီ... လက်တွေလည်း နာနေပြီ...ခန္ဓာကိုယ်ထဲမှာလည်း အသက်က ရှိနေရုံလေးပဲ ရှိတော့တယ်... အလံတိုင်နားမှာ ၂ ယောက်သား ပစ်လဲ-လို့...

အို... အဲသည်ညကတော့ ထမင်းစားလို့ ကောင်းသလားတော့ မေးမနေနဲ့.... နှင်းရေ့...

(ကင်းအတူ အိပ်ခဲ့ဖူးသော ရဲဘော်-ဇော်ဝင်း-သို့ ရှစ်လေးလုံး အရေးတော်ပုံ ၂၃ နှစ်မြောက် အမှတ်တရ)

atn

Jul 27, 2011

မာရီယာနှင့် နောက်ဆုံး ညစာ...





















အစကတည်းကိုက တောင်တွေကို ဖြိုချလို့ မရမှန်း သိခဲ့ရင်
ခါချဉ်ကောင် မာန်ကြီးပါ့မလား... မာရီယာ...

ဖြစ်ချင်လာပါတော့လည်း... ငါက ခါချဉ်ကောင် မဟုတ်...
နင်ကလည်း တောင် တလုံး မဟုတ်ပေါ့... မာရီယာ...

နင့် အမည်ကိုတောင်
မာယာ တထောင် သိမ်းဆောင်ထားတာကို ငါက ရီချင်လွန်းလို့
မာရီယာ-လို့ အမည်ပေး...

ရှိသမျှလေးနဲ့ ရောင့်ရဲလိုက်ပါ မာရီယာ...
လူတကာရဲ့ အထင်ကြီးမှု-သေးမှုများထဲမှာ
ဆက်လက် ကူးခပ်သွားပါ မာရီယာ...
မသေမချင်း... အခက်ဒမစ်-မင်း များနဲ့ ဆက်ချစ်သွားပါ မာရီယာ...
စကော်လာများနဲ့ ဘလော်ဂါ ဒေါ့ကွန်းမှာ အလွမ်းသင့်ပါ မာရီယာ...
ဗမာကဗျာကို ဘိုလိုရေးသူများအား အားပေးပါ မာရီယာ...
ဗမာ့ကဗျာ ကမ္ဘာကျော်စေရမည်လို့ အော်ချင်ရင်အော်ပါ...
ငါကတော့ ဘယ်သော အခါမျှ... ကိုယ်က ချစ်ရတဲ့သူ မဖြစ်ချင်ပါ...
ကဗျာတွေကို ပြောပါတယ်... မာရီယာ...
နင့်ကို ငါ မချစ်ပါဘူး... ကဗျာတွေကိုပဲ ချစ်တာပါ...
နင်ကသာ ငါ့ တယောက်တည်းကိုပဲ ချစ်တာပါ...
သည် အချစ်စစ်ပွဲမှာ ... ငါနိုင်တယ် မာရီယာ...
အချစ်စစ်ပွဲ ဆိုတာ...
ချစ်တဲ့သူက ရှုံးကြေးပဲ... အဲလို... အဲလို...
နင် အော်ငိုပါ... မာရီယာ...

တခုပဲ ပြောစရာရှိတယ်... မာရီယာ...
ကိုယ့်ကိုယ်ကို မသိမှုထဲမှာ အနုပဋိလောမကို ဒေါသ ထွက်နေစရာမလို...
ယုံကြည်ကိုးကွယ်မှု တခုအတွက် ဗုဒ္ဓကို ရှုတ်ချစရာမလို...
ခရစ်ယာန်တွေကို အပြစ်တင်ရန်မလို....
ညည်း သိပါတယ် မာရီယာ...

ဟောသည့် လောကကြီးကိုက
ကိုယ်တယောက်ကလွဲရင်
သူတပါး သန်းထောင်ချီနဲ့ အတူ
လိုက်ပါ ငိုကြွေး ရီမောနေရသော
လောဘ ဒေါသ သောက မောဟ အဟောဝတ ပြောပြမဆုံးသော ကမ္ဘာ...

ဘုရားသခင်ဟာ နင့်ကို ကယ်တင်မှာ မဟုတ်ဘူး...
နင်ဘာသာ နင့်ကိုယ်ကို နင် ကယ်တင်ရမှာ... မာရီယာ...

ဟောသည့် ညမှာ...
ငါဟာ...
ဒါ...
နင်နဲ့ နောက်ဆုံး ညစာ စားခြင်းပဲ... မာရီယာ...

နင်ဟာ... အစကတည်းကိုက ငါ့ညီမလေးပဲ...
အဆုံးသပ်နိဂုံးမှာလည်း နင်ဟာ ငါ့ ညီမကလေးပဲ ဖြစ်နေတယ်...

နင့်ကို ငါ မကယ်တင်နိုင်ခြင်း တခုကိုပဲ
ငါ ၀မ်းနည်းပါတယ် မာရီယာ...

နင့် ဘုရားသခင်
နင့်ကို ကယ်တင်ပါစေ...
အာမင်...

atn

Jul 24, 2011

မေမေ့ကိုပဲ သတင်းကောင်းပါးလိုက်ပါရဲ့...











စာမျက်နှာ တခု လွင့်ထွက်ကျသွားသလို နေ့တရွက် ဘ၀စာအုပ်ထဲက ပြုတ်ထွက်ကျ...
ကျနော်ကလည်း စိတ်လိုလက်ရ လိုက်ကောက်မနေချင်တော့ဘူး...
ကျပျောက်ချင်သလောက်သာ ကျပျောက်ကြပေတော့...
ကျနော့် စာအုပ်ထဲက စာမျက်နှာတချို့...
ကျနော်ကိုယ်တိုင် ဖြဲဆုတ်လွှင့်ပစ် မီးရှို့ပစ်ချင်နေ...
သူ့ မျက်လုံးနဲ့ အပြုံးတွေကို စာအုပ်အဖုံး မလုပ်နိုင်သေးသမျှ ကျနော် ရှုံးနေသေးတာပဲ...
မေမေ့ကို ပြောပြစရာ စကားလုံးတချို့ ရှိခဲ့တယ်...
အချစ်-ဆိုတာ အစာအိမ်ထဲမှာ မနေဘူး...
အချစ်-ဆိုတာ သူနဲ့ ကျနော့် နှလုံးသားထဲမှာပဲနေတယ်...
ဟုတ်ပါသလား မေမေ...
မဖြေချင်ရင်လည်း မဖြေပါနဲ့...
သူနဲ့ ကျနော်ကတော့ ကမ်းခြေတလျောက် လမ်းလျှောက်ထွက်ခဲ့ပြီ...
ဒုက္ခနဲ့သုခ အမည်ရသော ခရုခွံများကိုသာ ကျနော်တို့ နှစ်ယောက် လိုက်ကောက်ကြမလို့ပါ...
ကျနော်တို့ ပျော်ကြပါတယ် မေမေ...
အခြားအရာတွေကို ကျနော်တို့ နှစ်ယောက် ပြုမူဆောင်ရွက်မှာ မဟုတ်ဘူး...
ကျနော့်ကို သူ့ချစ်ခြင်းမှာ လိပ်ပြာရောင်စုံပျံသန်းနေတဲ့ ပန်းချီကားတချပ် ကျနော်ရတယ် မေမေ...
သူ့ကို ကျနော့် ချစ်ခြင်းမှာ သီချင်းတပုဒ်... သူကတော့ ခပ် အုပ်အုပ်ကလေး ရီမောလို့...
သက်တံ တစင်းကို ကျနော်တို့ ချစ်ခြင်းနဲ့ပဲ ချော့သိပ်လိုက်တယ်...
သဲမြေမွမွပေါ်မှာ နှစ်ယောက်အတူ ခြေရာ မချရသေးတဲ့ သောင်ကမ်းကို
ကျနော်တို့ နှစ်ယောက်အတူ ထမ်းထားတယ် မေမေ...
သူ့လက်သူကြွယ်မှာ လက်စွပ်တကွင်း ကျနော်ကိုယ်တိုင် အပ်နှင်းပြီးတဲ့အခါ
အဲသည် သောင်ကမ်းမှာ ကျနော်တို့ ဟန်းနီးမွန်းထွက်မယ်...
ကြယ်တွေ စုံလက်... လထွက်ည... ပက်ပက်စက်စက် လှပနေမှာပေါ့... မေမေ...
အဲသည့်ညမှာ သူပြုံးနေမယ့်အကြောင်း... မေမေ့ကိုပဲ သတင်းကောင်းပါးလိုက်ပါရဲ့...

atn

Jul 12, 2011

ထိုးစစ်ဆင်ရဦးမည့် မြို့...


သူနှင့်ကျနော်... နှစ်ယောက်သာ... ပျော်ရွှင် နေထိုင်နိုင်သော... မြို့ကလေးတမြို့ကို ...
ကျနော်တို့ နှစ်ယောက်... သိမ်းပိုက်ရပါဦးမည်...
ထိုမြို့ကို... သွေးထွက် သံယို အမှုများ... မရှိပဲ... အေးချမ်း ငြိမ်သက်စွာ... သိမ်းပိုက်ပြီးသောအခါ...
ပြာလဲ့ညိုရီနေသော... မိုးကောင်းကင်ကို... နောက်ခံထားလျင်... ကောင်းမည်လား....
ကျနော်ကတော့... သိပ်ပြီး... ၀ီစိကိစ္စ... မများမြောင်လှသူပါ...
သူကလည်း သိပ်... စိတ်ရှည်သူ... မဟုတ်ပါ...
ထိုအခါ... ကျနော်တို့ နှစ်ယောက်... အောင်မြေနင်းသောနေ့တွင်... တံပိုး ခရာများ... တီးမှုတ်မည် မဟုတ်ပါ...
ထိုနေ့တွင်... မနက်ခင်း နေရောင် နွေးနွေးအောက်မှာ... သူ့ပါးပြင်အား... ကျနော် နမ်းပါမည်...
ချစ်ခြင်းအားဖြင့်... ဖြေးညှင်းငြင်သာစွာ... သူ့ ပန်းနုရောင်လေးများကို... မြို့ရိုးတံတိုင်းမှာ... ချိတ်ဆွဲထားရမည်...
သူ ပျော်ရွှင် ရီမောနေသည်ကို... ကျနော်က... မြင်ချင် တွေ့ချင် နေသူ မဟုတ်လား...
မေတ္တာတရားသည်... လေပြေရူးလို... ကျနော်တို့ နှစ်ဦးအကြား... လှည့်ပတ်သွားလာနေသော မြို့ကလေးမှာ... ကျနော်တို့ ပျော်ရွှင်ပါမည်...
နေသာနေသော... နေ့ကလေး တနေ့မှာ... စွယ်တော်ရွက်ကလေး တရွက်လို... သူနှင့်ကျနော်သည်... ကမ္ဘာပေါ်မှာ... မရှိဖူးသေးသော... သစ်ရွက်ကလေး တရွက်... ဖြစ်ကြဦးမည်မှာ... သေချာနေပေသည်... ...
ထိုနေ့ရက်ကို... သင်တို့က အမည် ပေးချင်သလိုသာ ပေးကြပါ...
ကျနော်တို့ နှစ်ယောက် ပျော်ရွှင်နေကြပါမည်...
လမ်း-ဆိုသည်မှာ လျှောက်လှမ်းကြဖို့ပင် မဟုတ်လား....
ကျနော့် နှလုံးသားကတော့ သူ့လက်ဖျားလေးများကို ဆုပ်ကိုင်ထားချင်ပါသည်...
ကျနော်တို့ နှစ်ယောက် ရှေ့မှ လမ်းများကို လျှောက်လှမ်းဖို့ရာ... မည်သည့် အင်အားမျှ မလိုအပ်တော့ပါ...
ကျနော့် ရင်မှာ... သူ့ အပြုံးလေးများစွာကို... ချိတ်ဆွဲထားနှင့်ခဲ့ပြီးပြီ မဟုတ်လား...
ကျနော်တို့ နှစ်ယောက်သား... ထိုမြို့ကို ထိုးစစ်ဆင်နေပါသည်...

atn

Jul 10, 2011

အရေးပေါ် ကြေးနန်း...

















မျှော်လင့်ခြင်း-ဆိုသောစကားလုံးကို ထမင်းစားပွဲပေါ်မှ... ခါချပစ်မိသွားကြောင်း... ...
စန္ဒယားပေါ် ကြောင်လျှောက်နေသလိုမျိုး နေ့ရက်တရက်... ကျွန်ုပ်ကိုယ်ပေါ်ကို ကုပ်ကပ် တွယ်တက်နေကြောင်း...
အအေးပတ်ပြီး အသံဝင်သွားသော မြို့တမြို့သည် ကျွန်ုပ်အမည်ကို အလံပေါ်မှာတင်ပြီး မြို့တော်ခန်းမရှေ့ လွှင့်ပလိုက်ပါကြောင်း...
ချောင်းဆိုးပျောက်ဆေးရည်ပေါင်းများစွာကို အသည်းအသန် သတိရနေမိပြန်ပြီ... ဆိုသည့် အကြောင်း...
ဖန်ဆီဒိုင်း... ဖန်ဆီဒိုင်း... ဖန်ဆီဒိုင်း... စွဲနေပြီပေါ့လေ... ဆိုသော သီချင်းတပုဒ်က နားဝမှာ ပူလောင် ဆူကျယ် နေကြောင်း...
ယခုတော့... အဲသည် သုံးမရသည့် ပင်လယ်ကြီး တခုလုံးကို ၀က်သားတုတ်ထိုး လုပ်ပစ်လိုက်ရတော့မည်... (ပုပ်သွားမှာ... စိုး... လို့... ပါ...) ဖြစ်ကြောင်း...
ကြိုက်ကြိုက်- မကြိုက်ကြိုက် နေ စကြ၀ဠာမှာ ဂြိုဟ်ကြီး ၉ လုံး တန်းစီနေဦးမှာပဲ...ဆိုသော မိုက်မဲမှုများ... ရှိနေကြောင်း...
သတင်းခေါင်းစဉ်တွေကို မဖတ်ချင်ရင်လည်း သီချင်းတွေပဲ နားထောင်ပါ...ဟု... သန်းပေါင်းများစွာက ပြောဆိုနေကြောင်း...
ကဗျာများကို ချက်-ပြုတ်-ကျော်-လှော်-ဖုတ်-ကင်-စား-သောက်ခြင်း မပြုရ-ဆိုသော ဆိုင်းဘုတ် တခုတလေများ တွေ့မိလျင် ရက်ပ် သီချင်းများအား ချက်ချင်း အကြောင်းကြားကြပါရန်... သတင်း ပေးပို့အပ်...
တနှစ်မှာ ၃၆၅ ရက် ရပ်တန့်နေသော ဗီးနပ်စ် ရုပ်ထုအား... လှုပ်ရှားသွားလာခွင့် မပြုကြပါရန်... တောင်းပန်အပ်...
ညဥ့်အရပ်သည်... နက်နေလေပြီ... အမှောင်ကို... အူကြောင်ကျား မလုပ်အပ်ကြောင်း... တောင်းပန်အပ်...
မိတ္တူ အရပ်ရပ်ကို... ရှိရှိသမျှ သေနတ်ပြောင်းဝများမှာ... ကောင်းစွာ မွန်စွာ ထိုးထားအပ်ကြောင်း....
ကောင်းကောင်း မွန်မွန် အကြောင်းကြားအပ်...
(ဆုံး)

atn

စာမျက်နှာ (အချစ်)





















ကျနော် ဖွင့်ဖတ်လိုက်မိသော စာမျက်နှာ တခုမှာ... သူ့ နံနက်ခင်းလေး တခု ဖြစ်ပါသည်...
ထိုစာမျက်နှာပေါ် ကျနော့် အရိပ်များ မကျရောက်စေခဲ့ပါ...
အရှေ့အရပ်သို့ ဦးတည်ကာ... အနောက်အရပ်သို့ လျှောက်လှမ်းခဲ့သော ခရီးသွား ကျနော်သည်... အမှားအယွင်း တခုသာ ဖြစ်ပါသည်...
ကျနော့် နာရီများကို... သူ့ ရီမောသံများဖြင့်သာ... သံပတ်ပေးချင်ပါသည်...
မည်၍ မည်မျှ ချစ်ကြောင်းကို သူ့အားပြောပြရန်.. ခေတ်ကောင်းကောင်းတခုကို ကျနော် ထုဆစ်ရပါဦးမည်...
သူ့ ခြေရင်းမှာ... ကျနော် ချခင်းထားလိုက်ချင်သည့် အနာဂတ်သည်... ကျနော့် နှလုံးသားသာ ဖြစ်ပါသည်... ထိုနေ့မှာ... တော်မလဲရ... လေမတိုက်ရ... တောင် မပြိုရ... ပန်းများ မငိုရ...
မည်သို့သော အကြောင်းနှင့်မျှ... ဆုနာမိများ... မထရ...
မီးတောင်များ... ထူးခြားသော အကြောင်း တစုံတရာ မရှိပဲ မပေါက်ကွဲရ...
ကမ္ဘာကြီးသည်... လေ... မတိုက်ရ... မိုး... မရွာရ... နေ... မပူရ...
ပင်လယ်များ... အော်ဟစ်ပြီး မငိုရ...
ရှိရှိသမျှသော ခြေသွားလမ်းကလေးများ.... ဖြောင့်တန်းနေရမည်...
ထို တဒင်္ဂမှာ... မည်သည့် အကြောင်းနှင့်မျှ... မကွေ့ကောက်ရ...
သူ့ကို... ကျနော် ချစ်သော နှလုံးသားနှင့်အမျှ... လမ်းကလေးများ အားလုံး ဖြောင့်တန်းကြပါစေ...
ရှိရှိသမျှသော မြစ်နဒီများ... သူနှင့် ကျနော့်အားဖြင့်... ရီမော ပျော်ရွှင်သွားနိုင်ကြပါစေ...
တောပန်းအရိုင်းလေးများ အမျိုးစုံ ပွင့်လန်းနေသော... ခြေသွားလမ်းကောက်ကောက်လေးတခုမှာ...
သူ့လက်ကို ဆွဲယူဆုပ်ကိုင်ကာ... ကျနော် လျှောက်ပါဦးမည်...
သူ့အပြုံးလေး တပွင့်အား... ကျနော့် ပခုံးထက်မှာ ပန်ဆင်ထားခွင့်... ပေးပါဦး... ဘုရားသခင်...

အာမင်...

atn

Jul 9, 2011

ခုရက်တွေထဲမှာ... ကျနော်... ဘာမှ လုပ်လို့ မရဘူး... မေမေ... မေးခွန်းလေး တခုပဲ... အတွေးထဲ ရောက်ရောက်နေတယ်...


ယခုရက်များထဲ... ကံဆိုးမှု တိမ်တိုက်များ... ဝေးလွင့်သွားသည့် အကြောင်း... ချစ်သူ-မုန်းသူများကို ကျနော် ပြောကြားရဦးမည်...
သူ့ အပြုံးလေး မျိုးစုံကို... တနေကုန်အောင် ထိုင်ကြည့်နေမိသော ရက်များ... ပန်းနုရောင် ပန်းချီကားတချပ်လို... ချိုမြစွာ... ကျနော့် ရင်မှာ... တုန်ခါနေတော့သည်...
ကျနော် ခေါက်သိမ်းခဲ့သော... နေ့ရက်ဆိုး ညနက်ဆိုးများကို... အဖြူနုရောင် နံနက်ခင်းမှာ... ကမ္ဘာ့ ပြတင်းပေါက် တခုခုမှတဆင့်... အဝေးလွင့်ဆုံးအရပ်ဆီ... သူနှင့်ကျနော်... အတူ... ပစ်ချလိုက်ပါမည်...
အရိုးသားဆုံး... သူ့ကို ကျနော် ချစ်ခဲ့သည့် အကြောင်း... ဟောင်းနွမ်း ဆွေးမြေ့နေသော စကားလုံး များစွာကို... ဖယ်ရှားပစ်ပြီး... သစ်လွင် လန်းဆန်းနေသော ပန်းပွင့်ကလေးများဖြင့်သာ... အချစ် ကဗျာ တပုဒ်... ကျနော်... ယက်လုပ် ရွတ်ဆိုဖြစ်ပါပြီ...
ချစ်သူ... ကြား... သိ... ခံစား... နား... လည်... ပါ... လိမ့်... မည်... လား...

atn

Jun 26, 2011

အနောက်အရပ်အား ကျောက်ချထားပေးပါ့ ဘုရားသခင်...
























ပင့်သက် ခပ်တိုးတိုးကို ပင်လယ်များ ကြားအောင် ကျယ်လောင်စွာ ကျနော် ရှိုက်ခဲ့မိပြီ...
ရူးသွပ်မိုက်မဲစွာ သူ့ကို လိမ်လိမ်မာမာ ချစ်ခဲ့မိသောအခါ
ကျနော့် ကောင်းကင်ပြာပြာကြီးမှာ စိမ်းစိမ်း စိုစို လန်းလန်းဆန်းဆန်း ပွင့်လန်းနေပါတော့သည်...
အရှေ့အရပ်က ထွက်သော နေသည် သူနှင့်ကျနော် သိမ်းပိုက်ထားသောမြို့မှာ လုံးဝ လက်နက်ချခဲ့လေသည်...
အနောက်အရပ်မှာ မည်သို့သော အကြောင်းနှင့်မျှ နေမ၀င်စေရတော့...
သူ့ ဆံစ ကောက်ကွေးလေးများအတွင်း မနက်ခင်းနေကို ပန်းတပွင့်လို ကျနော် ချပ်ရပ်ပြီးသည့်အခါ...
ကျနော့် ဘ၀၏ နတ်သမီးမလေးအား ဗီးနပ်စ်-ဟု ကျနော် အမည်ပေးပါမည်...
သူပြုံးနေသည်ကို မြင်ရရုံနှင့် ကျနော့်ရင်ခုန်သံများ ပန်းရထားတစင်းဖြစ်ခဲ့ပြီ...
ထိုရထားသည် အရှေ့ မြို့ရိုးဆီသို့သာ ဦးတည်ပါမည်...
အနောက်အရပ်အား ကျောက်ချထားပေးပါ့ ဘုရားသခင်...

atn

Jun 25, 2011

နွေဦး နှင်းတို့ဖြင့် ကြွင်းရင်း...


















ကြိုးတကာမှာ
မမြင်ရတဲ့ ကြိုးတွေဟာ ပိုမို ထူထဲနေကြ...
အပင်တပင်ကို ပျိုးမိတဲ့ အခိုက်အတန့်ကျမှ
ရေလောင်းပေါင်းသင်ရတဲ့အကြောင်းကို
ကောင်းကောင်း လေ့ကျက်မိ...
အတ္တနှင့် ထိတွေ့လိုက်မိသော အရာအားလုံး
မိုးဦးကျ ပန်းပွင့်များလိုလို
စိမ်းစိမ်း စိုစို လန်းလန်းဆန်းဆန်း
လန်းရင်း... လွင့်ရင်း...
မနက်ခင်းကို ဆွဲဖွင့်လိုက်မိသော လက် အစုံမှာ
အပြာရောင် မှုန်နံ့သာအလွမ်း အစအနများဖြင့် ပေကျံစွန်းထင်းလျက်...
နှင်း မမှုန် ဆောင်း မရောက်ရသေးသော်ငြား
နှလုံးသား တံခါးပေါက်မှာ ရေခဲများ ကျောက်ဖြစ်ရုပ်ကြွင်း ဖြင့်သာ...
သည်လိုနဲ့ပဲ
အရာရာမှာ နောက်ကျနေခဲ့တဲ့ နွေဦးဟာ...
မောင်ပေါ့...
သစ်ရွက်ကလေးတရွက်ကြွေကျသွားမယ်ဆိုတာ မသိခဲ့ဘူး...

atn

Jun 16, 2011

အေတီအန်လည်း အများနည်းတူပါပဲ...





















ဖြစ်နိုင်သမျှအရာအားလုံးကို နှုတ်ဆက်လိုက်စမ်းပါ...

နောက်တနေ့ မနက်မှာ ပန်းနီနီ တပွင့်ကို မနက်ခင်း နှင်းဖြူဖြူတွေကြားထဲမှာ ရှက်သွေးပြာပြာနဲ့ နင် ပန်ဆင်လာနိုင်တယ်... ငါ့အတွက်...

ငါ့မှာ ငါကိုယ်တိုင် ပစ်လို့ခတ်လို့ကောင်းခဲ့ဖူးတဲ့ သေနတ် အဟောင်း တလက်လည်း ပြန်လည်ပြီး ရှိကောင်း ရှိလာနိုင်ပါ့... ငါ့ရန်သူတွေအတွက်...

ဒီမိုကရေစီ ရွှေသီး... ငတို့မြေကြီးမှာ ကောင်းကောင်း သီးပွင့်လာမှာ... စိတ်ရှည်ရှည်ထားစမ်းပါ...ကွယ့်... သင်တို့ အားလုံးအတွက်...

မိန်းကလေးတယောက်ရဲ့ အချစ်ကို တမိနစ်နဲ့ မရနိုင်ဘူး... နှစ်၂၀ ကြာချင်ရင်လည်း ကြာမှာပေါ့... ဖြစ်နိုင်ချေရှိနေတာပဲကို... မင်းတယောက်ထဲအတွက်...

ဟို နယ်စပ်က အမိုးတို့ရွာလေး ပြာကျသွားခဲ့တယ်... သို့သော်လည်း နောက်နှစ် ၂၀ ကြာရင် မြို့တမြို့ ဖြစ်ချင်ရင်လည်း ဖြစ်သွားမှာပေါ့... ဖိုးခွားတို့ အတွက်...

အသက် ၇၀ ပြည့်တဲ့ နှစ်မှာ ဒေါ်အောင်ဆန်းစုကြည်ဟာ... သမ္မတ ဖြစ်လာမှာ မဟုတ်ဘူးလို့ နင် ပြောနိုင်သလား...ဗမာပြည်အတွက်...

ATN

သရုပ်ဖော်ပုံကို ညီမငယ် ပန်ဒိုရာ(http://pandora-and-pandora.blogspot.com)က ကျေးဇူးပြုပါသည်။

Jun 13, 2011

အရိန္ဒမာ တလက်သာ ကျနော့်ကို ပေးပါ့ မေမေ...




















ကျနော့်ကို အသစ်တဖန် ပြန်မွေးပေးပါမေမေ...
ကျနော်ဟာ ဖေဖေ့သား မဖြစ်ချင်တော့ဘူး...
ကျနော်ဟာ မေမေ့သားပဲ ဖြစ်ချင်တယ်...

နှင်းတွေ ရေတံခွန်လို ထိုးဆင်းလာတဲ့နေ့မှာ ကျနော်ဟာ ရပ်တန့် ငေးမောနေမိတယ် မေမေ...
အချိန်ကာလတွေဟာ တံစိုးလက်ဆောင်လို ကံကြမ္မာကို အယောင်ဆောင်မှုတွေနဲ့ လာဘ်ထိုးတယ်...
အဆိုးအကောင်းတွေဟာ မျက်နှာဖုံးမျိုးစုံနဲ့ တိုးတိုက်လာခဲ့တဲ့ လေဟာနယ်မှာ
ကျနော် ရွေးချယ်စရာတွေ သိပ်များစွာ မရှိဘူး မေမေ...
ကျနော့် စာမျက်နှာကို မျက်နှာ မမူဘူးရင်
ကျနော် ကြုံတွေ့ရင်ဆိုင်နေရတဲ့ ပင်လယ်ကို ဘယ်လို ဖြတ်ကူးမလဲ ဘယ်သူ သိနိုင်မှာလဲ မေမေ...
အမြဲ ရှုံးနိမ့်ခဲ့ပေမယ့် စစ်မျက်နှာတိုင်းမှာ ကျနော်ဟာ ရွပ်ရွပ်ချွံချွံ တိုက်ခိုက်နေဆဲပါပဲ မေမေ...
ကျနော့် လက်ထဲမှာ ရှိနေနေတာကတော့ လဲကျသွားလည်း ပြန်ထလာခဲ့ သားရဲ့... ဆိုတဲ့ မေမေ့ စကားလေး တခွန်းပဲ...
ကျနော်ဟာ အကြိမ် ဘယ်လောက်များစွာ လဲကျခဲ့ပြီးပါပြီလဲ မေမေ...
ကျနော်သိနေတာကတော့ ကျနော်ဟာ ခုထက်ထိ ကျနော့် ခြေထောက်အပေါ်မှာ ရပ်နေမိတုန်းပဲ...
ကျနော် အတောင်ပံတွေ ဘယ်သူ့ဆီကမှ မငှားမိသလို...
ဘယ်သူ့ နှာခေါင်းကိုမှလည်း ကျနော့် ခေါင်းမှာ မတပ်ထားမိပါဘူး မေမေ...
တခါတခါမှာ ကျနော်ဟာ ငိုကြွေးရင်းကကို စစ်ရထားတစင်းလို ကံကြမ္မာကို တက်နင်းပစ်ခဲ့ပါတယ် မေမေ...
ကံကြမ္မာကို လှံနဲ့ ထိုးပစ်ခဲ့ဖို့ရာ ကျနော့်မှာ အရိန္ဒမာ-တလက်လောက်တော့ ပက်ပက်စက်စက်ကို လိုအပ်နေပါပေါ့ မေမေ...

ATN

လေလွင့်နှလုံးသား၊ ရထားတစင်း၊ နှင်းကျခဲ့သောအရှေ့မြို့ရိုး... (၄)

















အပိုင်း (၃)

မိတ်ဆွေ သူငယ်ချင်း ဆိုသည်မှာ မည်သို့သော အရာနည်း။ မသိပါ။ တယောက်တည်း ရှင်သန်နေနိုင်သူသည် မိတ်ဆွေ သူငယ်ချင်း အဖြစ် တစုံတယောက်ကို လိုအပ်လိမ့်မည်လား။ မသိပါ။ တစုံတယောက်ကို မိတ်ဆွေ သူငယ်ချင်း အဖြစ် လိုအပ်နေသူသည် တယောက်တည်း မရှင်သန်နိုင်နေသူလား။ မသိပါ။ အထီးကျန်နေသူ တယောက်သည် မိတ်ဆွေသူငယ်ချင်းတယောက်ယောက် ရှိကိုရှိရလိမ့်မည်လား။ မသိပါ။ လောလောဆယ်ဆယ် မိတ်ဆွေ သူငယ်ချင်း တစုံတဦးမျှ မရှိသူသည် အထီးကျန်နေသူလား။ မသိပါ။ တယောက်တည်း မရှင်သန်နိုင်သူသည် အထီးကျန်နေသူ တယောက်ဖြစ်မည်ထင်သည်။ မသေချာပါ။ အထီးကျန်မှုကို ခံစားနေရသူသည် သူ့ပတ်ဝန်းကျင်ထဲသို့ မည်သို့သော မက်ဆေ့များကို လွှင့်ထုတ်မည်လဲ။ မသိပါ။ တယောက်တည်း မရှင်သန်နိုင်ကြောင်း၊ မိတ်ဆွေ သူငယ်ချင်း တစုံတဦးကို လိုအပ်နေကြောင်း သတင်းပို့ချက်များ လွင့်ပြန့်နေမည်လား။ မသေချာပါ။ မိတ်ဆွေ သူငယ်ချင်းအဖြစ် တစုံတဦးကို ရရှိနေသည့်အခါ အထီးကျန်မှုများ သေဆုံး ပျောက်ကွယ် သွားလိမ့်မည်လား။ မသိပါ။ သေချာသိသည်မှာ မိတ်ဆွေ သူငယ်ချင်းများစွာ မရှိခဲ့ခြင်းသော အဖြစ်ကိုသာ ၀တ်ရုံတခုလို ခြုံခဲ့ဖူးသော အတိတ်ကာလသည် ကျန်ရစ်ခဲ့ပြီ။ သေချာသိသည်မှာ မိတ်ဆွေ သူငယ်ချင်း တစုံတဦးမျှ မရှိသော ဘ၀မှာ ရင်ထဲမှ ရှိသမျှသော ခံစားချက်များ ဝေဒနာများကို လွှင့်ထုတ် ဖြန့်ကျဲပစ်လိုက်ဖို့ရာ စကားပြောစရာ ရင်ဖွင့်စရာအဖြစ် ဘလော့ တလုံးကို တည်ဆောက်မိခြင်းသာ ဖြစ်သည် မဟုတ်လား။ သေချာပါသည်။ တယောက်တည်း ရှင်သန် မနေနိုင်သူသည် အထီးကျန်နေသူ ဖြစ်သည်။ အထီးကျန်နေသူများသည် ဘလော့ တလုံးလောက်တော့ အနည်းဆုံး ပိုင်ဆိုင်ကြသည်။ မဟုတ်လား။

++++++++++++++++++++++++++++++++++++++++++++++++++++++++++++++++++++++

အပိုင်း(၃) အစ

- (မေ)ပါ အကို... နေကောင်းလား... -
- ဟုတ်ကဲ့... ကောင်းပါတယ်... မမေရော နေကောင်းလား... -
- ဟုတ်ကဲ့ အကို... မေ-လို့ပဲ ခေါ်ပါနော်... ညီမက အကို့ထက် အများကြီးငယ်ပါတယ်... ၁၉၇၄ မှ မွေးတာဆိုတော့ အကို့ထက် ၁၀ နှစ် ငယ်ပါတယ်... -
- အင်း... ဟုတ်ပါပြီ... -
- မေ-က မကာအိုမှာပါ အကို... -
- သြော်... ဟုတ်လား... ကျနော်က စလုံးလား- ဟောင်ကောင်လား- ထိုင်ဝမ်လား - တခုခုပဲ ထင်နေမိတာ... ကျနော် ထင်ရင် လွဲတာချည့်...း( ....
-း) .... အင်းလေ... မေ-ရေးတဲ့ စာတွေ ဖတ်မိရင် အဲလိုပဲ ထင်မှာပေါ့... အကို့စာတွေ ဖတ်ရင်တော့ အမေရိကမှာမှန်း တန်းသိတာပဲ... အကိုက ပေါ်တင်တွေ ရေးတင်နေတာကိုး... -
- အင်း မသိတော့ပါဘူးဗျာ... -
- အကို့ စာတွေ ကဗျာတွေကို မေ- အတော် နှစ်သက်တယ် အကို... -
- ကျေးဇူးပါ ဗျာ... နောက်မှ တွေ့မယ်ဗျာ... ကျနော် သွားစရာ တခုရှိသေးလို့... -
- ဟုတ်... -
++++++++++++++++++++++++++++++++++++++++++++++++++++++++++++++++++++++++++++++++

အပိုင်း(၃) အလယ်

- အကို နေကောင်းလား... -
- ကောင်းပါ့... အဲမှာ ည သန်းခေါင်ကျော်နေပြီ မဟုတ်လား... မအိပ်သေးဘူးလား မေ... -
- အိပ်တော့မလို့ပဲ... ခုတော့ အိပ်သေးဘူး... အကို လိုင်းပေါ်တက်လာတာတွေ့လို့ လှမ်းခေါ်လိုက်တာ... အကိုနဲ့ စကားပြောရတာ စိတ်ချမ်းသာတယ်... -
- အဲ... ဘိုဖြစ်လို့လဲ... စိတ်ချမ်းသာအောင် ဘာမှလည်း မပြောမိပါဘူး... -
- မဟုတ်ဘူးလေ... မေ-က သည်မှာ ကြုံတွေ့နေရတာတွေကို ပြောပြရမယ့်သူက မရှိတော့ ပြီးတော့ အွန်လိုင်းမှာ ခင်တဲ့ ဘလော်ဂါဆိုတာကလည်း အကို တယောက်ပဲ ရှိတော့ အကို့ကိုပဲ ပြောပြနေမိတာ... အကိုက စိတ်ရှည်လက်ရှည် နားထောင်ပေးတယ်... ပြီးတော့ မေ- စိတ်ဓါတ်ကျတဲ့အခါ အားလည်း ပေးတတ်တယ်... မေ- စိတ်ညစ်နေတဲ့အခါ ရီစရာတွေ ပြောပြီး မေ့-ကို ပျော်အောင် လုပ်တတ်တာ ဆိုတော့ အကိုနဲ့ စကား ပြောရရင် စိတ်ချမ်းသာတယ်..-
- အင်းလေ... အကို ခုလို ကြားရတာ ၀မ်းသာပါတယ်... မိတ်ဆွေ သူငယ်ချင်းတွေ ဆိုတာ တယောက်ကို တယောက် အားပေးရမှာပေါ့ မဟုတ်ဘူးလား... -
- ဟုတ်တယ်လေ... ဒါကြောင့်လည်း အကို စိတ်ဓါတ်ကျနေတယ် ထင်တဲ့အခါ အကို့ကို မေ့ အချိန်တွေပေးပြီး အနားမှာ စကား လာပြောပေးနေတာ အကို မသိဘူးလား... -
- အင်း... သိပါတယ်... အဲ အတွက်လည်း ကျေးဇူးပါ မေ... -
- ကျေးဇူးတင်စရာ မလိုပါဘူး အကို... အဲဒါကမှ သူစိမ်းဆန်တာ... -
- အယ်.. အဲလိုတော့ မဟုတ်ပါဘူး... ဒါပေမယ့် အကိုနဲ့ မေနဲ့က စကားတွေ အများကြီး ပြောဖူးတယ်... ဖုန်းနဲ့ တခါတလေ စကား ပြောဖူးတယ်... ဓါတ်ပုံတွေ အပြန်အလှန် ပို့ဖူး မြင်ဖူးတယ်... ဗီဒီယိုချက် ၂ ခုမှာ တယောက်ကို တယောက် စက္ကန့် ၂၀ စီလောက် တွေ့ဖူးတယ်... လူချင်းကတော့ တခါမှ မတွေ့ဖူးတော့ အလွန်ရင်းနှီးသောသူစိမ်းတွေပဲ မဟုတ်လား... ဒါကြောင့် ကျေးဇူးတင်တယ် ပြောတာ... -
- ဟမ်... ဘယ်လို ပြောလိုက်တယ် အကို...  အလွန်ရင်းနှီးသောသူစိမ်း ဟုတ်လား... အကို့ကို တော်တော် အမြင်ကပ်နေပြီနော်... -
- မဟုတ်လို့လား... ကပ်ချင်လည်း ကပ်ပေါ့... -
- ကပ်တယ် ကပ်မယ်...ဒါပေမယ့် သူစိမ်း-ဆိုတာကြီးကို အကို ဖြုတ်ပေးပါ... အလွန်ရင်းနှီးသော-ဆိုတာကိုပဲ ချန်ထားပါ... ဒါပဲ... -
- အား... ရာဇသံ-လား... အမိန့်-လား... -
- တခုမှ မဟုတ်ဘူး... အကို့ကို မေ- တောင်းခံနေတာပါ... -
- အလိုဗျာ... ပေးစရာ ပိုက်ပိုက် တပြားမှ မရှိဘူး... -
- အကိုနော်... လျှောက်နောက်မနေနဲ့... မေ-က အတည် ပြောနေတာ... မေ့-ကို ၀မ်းနည်းအောင် မလုပ်နဲ့..-
- အာ... ဘာလုပ်လို့လဲ... ပျော်အောင် စနေတာကို... -
- သူစိမ်း မဖြစ်အောင် မေ-လုပ်ရတော့မှာပေါ့... -
- အမ်... ဘာလဲ.. -
- အကို့ကို မေ-ချစ်တယ်... အလွန်ရင်းနှီးချင်တယ်... သူစိမ်းမဖြစ်ချင်ဘူး... ဒါပဲ... သွားပြီ... သူစိမ်းဖြစ်ချင်ရင် နောက် ဘယ်တော့မှ စကားလာမပြောနဲ့တော့... -
- ဟယ်... -
May did not receive your chat.

+++++++++++++++++++++++++++++++++++++++++++++++++++++++++++++++++++++++

အပိုင်း (၃) အဆုံး

Love is a language spoken by everyone, but understood only by a heart.
~ Shirley Rindani ~

မိတ်ဆွေ အပေါင်းအသင်း ဖြစ်သွားကြတာတွေ... စိတ်အနေပြောင်းရင်း ချစ်သွားကြတာတွေ... ဒါတွေ တကယ်တော့ မဆန်းပေ... သည်လို အဖြစ်မျိုးထဲမှာ... ချစ်ကျိုးနည်းရမှာလားလေ... တက္ကသိုလ်ကျောင်းက ငွေလမင်းရေ... ဘယ်ကမ္ဘာသွား... ဘယ်မှာများ သာနေပလဲလေ...

သီချင်း အချို့သည် စိတ်ကို တက်ကြွလာစေသည်။ ဥပမာ - စစ်ချီသီချင်းများ၊ ကြိုးကြာသံ- ကဲ့သို့သော ဘ၀အားမာန်ကို ဖွဲ့ဆိုသော သီချင်းများ။ သီချင်းအချို့သည် ပျော်ရွှင်စရာ ကောင်းသည်၊ ထကချင်စရာ   ကောင်းသည်။ ဥပမာ... ဒိုးကလေး နှင့် နပမ်းဆံ -ကဲ့သို့သော သီချင်းများ။ သီချင်းအချို့သည် ချစ်ခင်မြတ်နိုးစရာ ကောင်းသည်။ ဥပမာ - ဇော်ဝမ်း-ဆိုခဲ့သော ကြယ်ကလေး သီချင်းမျိုး။ သီချင်း အချို့သည် ၀မ်းနည်းစရာ ကောင်းသည်။ ဥပမာ - နောက်ဆုံးအိပ်မက်-ကဲ့သို့သော သီချင်းမျိုး။ သီချင်း အချို့သည်   ကြေကွဲစရာ ကောင်းသည်။ ဥပမာ - မုန်းရစ်လေဦး။ သီချင်းများကို    နှစ်သက်သူတိုင်း ပျော်ရွှင်စရာ သီချင်းများကိုသာ သီဆို နားဆင်လိုကြမည်သာ။ သို့သော်လည်း ဘ၀သည် ပျော်ရွှင်စရာ သီချင်းများကို ခံစား သီဆို နားဆင် ပြီးသွားသော အခါ ၀မ်းနည်း ကြေကွဲစရာ သီချင်းများကို နာကျင် သီဆို နားဆင်နေရသည့် ဖြစ်စဉ်ကြီးတခု မဟုတ်လား။ မိတ်ဆွေ သူငယ်ချင်းများကို ရရှိပြီးမှ မိတ်ဆွေ သူငယ်ချင်း အဖြစ်မှ ဆုံးရှုံးရသည့် အဖြစ်ကိုလည်း မလိုချင်။ ချစ်ပြီးမှ မုန်း-အဆုံးသပ်ကိုလည်း မလိုချင်။ ကြေကွဲစရာ သီချင်းများကိုလည်း နားမဆင်ချင်ပါ။
----------------------------------------------------------------------------------
မုန်းလျင် အပြစ်... ချစ်လျင် အကျိုး... မြတ်နိုးတော့ သဒ္ဓါ... အိပ်မက် သံသရာမှ နိုးထစေချင်သည်... ဖြိုးဖျ ရွှေရင် ဘ၀င်သိမ့်သိမ့် ငြိမ့်ငြိမ့်ရည်... ကျမတို့ ငယ်ငယ် အမိရယ် အဖရယ် ဘ၀၀ယ် စုံစုံညီ... ချစ်သဒ္ဓါလောင်း လှစ်ကာပြောင်း... ချစ်ကြောင်း ကုန်စင်သည်... ချစ်ကြောင်း ကုန်စင်သည်... တမိတ၀မ်း ချမ်းမြလျှမ်းပ... ဘယ်သူ့မှ မမျှမဝေ... ရလေ လိုလေ... ချစ်ခဲ့မိပါသည်...


သစ္စာအမြဲ မရမနေအထိသာ... မေတ္တာအသည်း မျှဝေကြည့်ကာ.. သိရတာ စာနာပြီ... သနစ်ဇာတ်နမူ စုံလျှင် မမေ့ပြီ... အချစ်-ငတ်သူတွေ တပုံတပင် တွေ့ရပါပြီ... ချစ်တတ်သူ အဆွေ... ဘ၀င် ဟာဒယထဲ... အသည်းတွေ ခွဲဝေ... ပေးနိုင်ရပါမည်... မေတ္တာ ယူတော့... မေတ္တာပေး... တေး အဓိပ္ပါယ် အသွယ်သွယ် ထူးတလီ... ကျေးဇူး တင်ရပါလေမည်...


ကျေးဇူးသခင် အရှင်များပြား... ဝေးကွာငြားလည်း အသည်းက မေတ္တာ အခါခါရည်... မောင်လေး-ညီမလေးများကိုဖြင့်... ခွန်းဆင့်ကဗျာ... မှာပါမည်... ကျနော်တို့-ကျမတို့သည်... ကျနော်တို့-ကျမတို့သည်... ချစ်လေသူကို... ချစ်လေသူကို... ကိုယ်က တဖန် ပြန်လည် ချစ်တတ်ကြပါစေအတည်... ဘ၀တေးဆိုလျင်... ခဏကလေး မဆိုချင်... ကျော့ကျော့လွင်လှ... အသွင် လှပါစေမည်... သို့သော်လည်း... မုန်းတေးတခါ ကျော့လျင်... ချစ်တေး တရာ နှစ်ရာ သုံးရာ လေးရာ... အခါခါ ကျော့စေချင်ပါသည်... အခါခါ ကျော့စေချင်ပါသည်...

(ဆက်လက်ဖော်ပြပါမည်)

Strayed Heart

Jun 10, 2011

မီရှဲလာသို့...




















မီရှဲလာ... ညည်း မျက်လုံးပြာပြာလေးတွေဟာ ချစ်ဖို့ကောင်းတယ်... ညည်း ဆံပင် တွန့်လိမ် ကောက်ကွေးလေးတွေဟာ ပွတ်သပ် ဆော့ကစားချင်စရာကောင်းတယ်... ညည်းက ဂစ်တာတလုံး လွယ်လာတော့မှသာ ငါက ညည်းကို စကား ပြောဖြစ်တာ... နင် ဂစ်တာတီးသလား... ဆိုတော့... အင်း... တဲ့... နင်ကရောတဲ့... ငါ့ကို ပြန်မေးတဲ့ နင့်မျက်လုံးလေးတွေဟာ ကလေး တယောက်လိုပဲ... ပြာလဲ့နေရော... တီးတာပေါ့... နင့် အသက်ထက်တောင် ကြီးဦးမယ်လို့ ငါပြောတော့... ကျမ အသက် ၂၀ ပြည့်ပြီးပြီ-တဲ့... ငါ့ သမီးလေးသာ ညည်းဖြစ်လိုက်ပါတော့လား... မီရှဲလာ... သား ၃ ယောက် ရှိတဲ့ ဖခင်တယောက်ဟာ သမီးလေး တယောက်တော့ လိုအပ်နေပါတယ်... အဖေကို နွဲ့ဆိုး ဆိုးမယ့် သမီး ဆိုးဆိုးလေး တယောက်ကို ငါလိုအပ်နေတော့တာပေါ့... မီရှဲလာ... ညည်းကြည့်ရတာကလဲ ခပ်ဆိုးဆိုးလေးပဲ မဟုတ်လား... မျက်နှာထား တင်းတင်းနဲ့ လောကကြီးထဲ ခပ်ရဲရဲ နင်းချလာတဲ့ ညည်း ခြေလှမ်းတွေကို ငါ ကြိုက်တယ်... ခပ်မိုက်မိုက် သမီးဆိုးတယောက်ကို ဖခင်က မျက်ထောက်နီနဲ့ ကြည့်သလိုမျိုး ငါကြည့်မိတော့ ညည်းက ငါ့ကို မေးပါလေရော... ဘာလို့ ငါ့ကို အဲသလောက် ကြည့်နေရတာလဲ... တဲ့... အေး... နင်သာ ငါ့သမီးဆိုရင် ညည်းလက်မောင်းက တက်တူးကို အရေခွံနဲ့ပါ တွဲပြီး ခွာပစ်လိုက်ပြီးပြီ-ဆိုတော့ နင်ရီတယ်... ဟက်ဟက်ပက်ပက်... ပြီးတော့မှ ပြောတယ်... အဲသည် တက်တူးဟာ ဒေါ်လာ ၂၀၀ တန်သတဲ့... ဘုရားရေ... မီရှဲလာ... နင့်လုပ်စာ နာရီ ၂၀...ကို နင့်လက်မောင်းမှာ စုဆောင်းထားတယ်လား... အဲသလို ငါပြောတော့... နင့် ရီမောသံလေးတွေဟာ တော်တော် ချစ်ဖို့ ကောင်းတာပဲ... ညည်းလိုမျိုး သမီးလေး တယောက်ကို ဘာကြောင့် ငါမရခဲ့တာလဲ... မီရှဲလာ... ငါ့သားကြီးဟာ ခုမှ အသက် ၁၄ နှစ်ပြည့်မှာ... ညည်းသာ ငါ့သမီးဆိုရင် သားကြီးဟာ သူ့ အမကြီးကို သိပ်ချစ်မှာပဲ... ... လို့ ငါ ဆိုတော့... ငါ့မှာ မောင်နှမ ၁၄ ယောက် ရှိတယ်-တဲ့... ဟယ်... တကယ်လား ဆိုတော့... ဟုတ်တယ်-တဲ့... ငါတို့က်ို အစိုးရက မွေးစားထားတာလေ-တဲ့... ငါ့အဖေနဲ့ အမေကို ငါကိုယ်တိုင် ဘယ်သူမှန်း မသိဘူး-တဲ့... မီရှဲလာရယ်... ဒါကြောင့်ပဲ နင့်မျက်နှာလေးက အမြဲပဲ တင်းမာနေတာကိုး... ဒါကြောင့်ပဲ နင့် ခြေလှမ်းတွေက အမြဲပဲ ရဲရင့်နေတာကိုး... မီရှဲလာ... နောက် တနှစ်ဆိုရင်... အမေရိကားမှာ တရားဝင် နင် အရက် ၀ယ်သောက်လို့ရပြီ... မီရှဲလာ... ငါ စိတ်ပူတယ် မီရှဲလာ... နင်သာ ငါ့သမီးလေးဆိုရင်... မီရှဲလာရယ်... ... အိုး... မီရှဲလာရယ်... နင်... နင်.. လိမ်လိမ်မာမာနေပါ သမီးရယ်...

ATN

Jun 6, 2011

အပြာရောင်ဒိန်ခဲ (Blue Cheese)


















ဒိန်ခဲ တတုံး ၀ယ်ခဲ့ပါတယ်... အပြာရောင်... အိမ်ပြန်တော့ မှောင်နေပြီ... သေသွားတဲ့ ကြောင်ကြီးတကောင်ကိုလည်း သတိရနေမိပေါ့... ကဗျာတွေကိုတော့ မရေးဖြစ်တာကြာပြီ... အရှေ့ဆီမှာ ရောင်နီလေး သမ်းလို့လာပြီ မိုးလင်းတော့မယ် ထတော့ ညီမလေးရယ်-ဆိုတဲ့ ထီးဆိုင်သီချင်းကလည်း ညကြီးမှောင်မဲထဲ မျှော်လင့်ချက်ပေပဲလား... ကားရှေ့ မီးရောင်မှာတော့ နက်ပြောင်နေတဲ့ ကတ္တရာလမ်းမ... လူတကာကို ပြောင်ပြ နေသလိုလို... အမေရိကရဲ့ ညများက အရောင်စုံတယ်ဆို... ကိုကာကိုလာ တခွက်သောက်ရင်း မူးသွားတဲ့ညက ရမ်းကားနေပုံ... ဂျက်ကို လည်ပင်း မဖက်ရသေးတဲ့ ရင်တွေ ခုန်သွားကြ... အမူးသမားည... တွေ့သွားရင်... ဆက်မတွေးချင်တော့ဘူး... မမူးရသေးလို့ပါပဲ... ၀ယ်ခဲ့တဲ့ ဒိန်ခဲကို တဖဲ့ဖဲ့တယ်... အပြာရောင်တွေ လက်ဖ၀ါးအပေါ် ကျိုးပဲ့ကြေကျသွား... အပြာရောင် ဒိန်ခဲထဲမှာ... အချိန်ကာလတွေကို အေးခဲထားတဲ့ သိပ္ပံခေတ်လွန် ၀တ္ထုတိုတွေထဲက စကားလုံးတွေ ပါသလား... ဘုရားသခင် ကယ်မပါ... ဒိန်ခဲအပြာက အော်တယ်... ကျနော် ဘာလုပ်မိလို့လဲ-တဲ့... ဟဲ့... နင်က- ဒိန်ခဲ... ပြီးတော့- အပြာ ... ပြီးတော့ နင့်မှာ Gender ရှိတာ မဟုတ်ဘူး-တဲ့... တစုံတယောက်က ပြာပြာသလဲ ၀င်ပြောနေပေါ့...ဒုက္ခပါပဲဗျာ...ဒိန်ခဲတွေမှာလည်း အပြာဆိုတာ ရှိမပေါ့... ခင်ဗျားတို့ကတော့ ဒိန်ခဲတွေကို ဘာအရောင် ဖြစ်စေချင်နေလို့လဲ... ဒိန်ခဲဆိုတာ ဒိန်ခဲပဲ... မိန်းမလည်း မဟုတ်ဘူး... ယောက်ျားလည်း မဟုတ်ဘူး... ဒိန်ခဲ အပြာက ကက်ကက်လန်အောင် ရန်ထောင်နေပေါ့... ဒိန်ခဲ အပြာတွေကို ၀ယ်မိတာ မှားပြီ ထင်တယ်...

ATN

Jun 5, 2011

လေလွင့်နှလုံးသား၊ ရထားတစင်း၊ နှင်းကျခဲ့သောအရှေ့မြို့ရိုး... (၃)
















အပိုင်း (၂)

နားလည်မှု ဆိုသည်မှာ မည်သို့သော အရာနည်း။ မသိပါ။ လူ တယောက်တည်း ရှိနေသည့်အခါ နားလည်မှုကို မလိုပါ။ ၂ ယောက်နှင့် ၂ ယောက်အထက် ရှိမှသာ လိုအပ်လာသည့် အရာဟု ထင်သည်။ ထိုအရာသည် မည်သို့နည်း။ မသိပါ။ တယောက်တည်း ရှိနေသည့်အခါ ထိုအရာကို မလိုအပ်သည်ကိုသာ သိသည်။ သို့သော်လည်း တယောက်တည်း ရှိမနေသည့်အခါ ထိုအရာကို လိုအပ်လာနေသည်ကိုလည်း သိလေသည်။ နားလည်မှု ဆိုသော ထိုအရာသည် မည်သည့်အရာနည်း။ အပေး အယူလား။ တဖက်သပ်ပေးခြင်းလား၊ တဖက်သပ် ယူခြင်းလား။ အပြန်အလှန်လား။ Give & take လား။ သို့တည်း မဟုတ် တခြား တစုံတရာရာလား။ နားလည်မှုသည် လူ ၂ ယောက် ရှိသည့် အခါ လိုအပ်သည်ကိုတော့ သိနေသည်။ တယောက်တည်း မဟုတ်။ ၂ ယောက်။ သည်အခါ နားလည်မှုဆိုသည့် စကားလုံးက ရှေ့မှောက်သို့ ရောက်ကို လာတော့သည်။ ခက်တော့လည်း ခက်သည်။ နားလည်မှုကိုပင် နားလည်မှုပေးနေရသည်ကို ခက်ခဲနေသည့်အခါ... နားလည်မှုဆိုသည်မှာ နားမလည်မှု တခုပင် ဖြစ်နေလေတော့မည်လား မသိ။ ကိုယ်တိုင် နားမလည်မှုများကို နားလည်နိုင်လျှင် နားလည်မှုကို နားလည်နိုင်လိမ့်မည်လား။ မသိပါ။ ယခုလောလောဆယ်တော့ နားလည်မှုသည် ယူဇနာ တသိန်းကျော် အကွာမှာ ရှိနေသည်ဟု နားမလည်နိုင်စွာ နားလည်နေမိခြင်းသည်ပင်လျှင် နားလည်မှု၏ နိဒါန်းအစလားဟူသော အမေးကိုလည်း နားမလည်နိုင်တော့ပြီ။

++++++++++++++++++++++++++++++++++++++++++++++++++++++++++++++++++++++++++++++++++

အပိုင်း (၂) အစ

- နေစမ်းပါဦး... အဲကောင်မက နင့်ကို နေ့တိုင်း နှုတ်ဆက်နေရတာ ဘာကြောင့်လဲ... -
- ဟ... ငါဘယ်သိမလဲ... နင်သိချင်ရင် သူ့သွားမေးပေါ့... -
- နေ့တိုင်း ငါ စောင့်ကြည့်နေတယ်... Good Morning လုပ်ရတာနဲ့... How are you လုပ်ရတာနဲ့... -
- အဲတာ ဘာဖြစ်သလဲ... အဲကောင်မမှ မဟုတ်... ဟိုး customer service က အချောက်ကလည်း အဲလိုပဲ ပြောတာပဲ မဟုတ်လား... ပြီးတော့ Meat Department က အဖိုးကြီးကလည်း နေ့တိုင်း အဲလိုပဲ ပြောတာပဲ... -
- အေး... အဲတာကိုပဲ ပြောမလို့... အဲ အချောက်ပဲ ပြောပြော... အဖိုးကြီးပဲ ပြောပြော... ဘာမှ မဖြစ်ဘူး... အဲကောင်မ ပြောလိုက်ရင် နင့်မှာ... မနေတတ် မထိုင်တတ်နဲ့... ဘာဖြစ်တာလဲ... -
- ဘာဖြစ်လဲ ဆိုတော့... ရှင်းရှင်းလေးပဲလေ... နင်က ငါ့ကို အဲကောင်မနဲ့ ပြဿနာရှာနေတာကိုး... အဲတော့ သူ နှုတ်ဆက်ရင် ငါ့မှာ နင့်မျက်နှာကို ကြည့်ရတော့တာပေါ့... နားမလည်ဘူးလား... -
- အော... နားလည်လို့... ပြောနေတာပေါ့... နင့်ဘာသာ ရိုးသားရင်... ဘာမှ ဖြစ်နေစရာမလိုဘူး... -
- ငါ့ဘာသာ ရိုးသားတယ်... ဘာမှ မဖြစ်ဘူး... နင့် စွပ်စွဲချက်တွေ... ပြဿနာလုပ်တာတွေနဲ့သာ... ငါ့မှာ ခြောက်ခြားနေရတာ... -
- ရှင်းရှင်းလေးပဲ... နင်သာ ရိုးသားရင် ဘာမှ ခြောက်ခြားနေစရာ မလိုဘူး... မရိုးသားလို့ ခြောက်ခြားနေတာပေါ့... -
- ဟား... ပြောလေ ဆိုးလေပါလား.... နင့်မှာ နားလည်မှု ဆိုတာရော ရှိသေးလို့လား... -
- ငါက နင့်ကို ဘာနားလည်ပေးရဦးမလဲ... အဲကောင်မ လာတော့မယ့် ၉ နာရီ ထိုးကာနီးရင်... နင် မနေတတ် မထိုင်တတ်တွေ ဖြစ်နေပြီ... ဟိုဟာ ကိုင်သလိုလို သည်ဟာ ကိုင်သလိုလို... -
- နင် ငါ့ကို မစွပ်စွဲနဲ့... နင်ထင်တာတွေကို နင်ပြောပြီး အမှန်တရား မလုပ်နဲ့... -
- ငါ စွပ်စွဲတာ မဟုတ်ဘူး... နင်ကိုက အဲသလို ဖြစ်နေတာ... -
- နင် အဲသလို ထင်နေတော့... ဒါက နားလည်မှု လွဲနေတာပဲ... ငါက အဲသလိုမှ မဟုတ်တာ... အဲကောင်မကို ငါ့မှာ ဘာစိတ်မှလည်း မရှိဘူး... ဒါမယ့် နင် ငါ့ကို သူနဲ့ စွပ်စွဲနေတော့... အဲကောင်မ အလုပ် ၀င်ကာနီးဆို နင်ငါ့ကို ကြည့်တဲ့ အကြည့်တွေကို ငါ မခံနိုင်ဘူး... I am innocent. But I feel your fault finding look. အဲသည် အကြည့်တွေကို ငါ မခံနိုင်ဘူး... I feel nervous, OK! -
- နင့်မှာ အပြစ် မရှိရင် နင့်ဘာသာ သည်အတိုင်းနေပေါ့... ခုတော့ အဲကောင်မလာပြီဆို နင့်မှာ ပြာနေတာပဲ... အဲဒါကိုလည်း ငါ နားမလည်ဘူး... -
- ကဲ... အဲဒါဆိုလည်း ပြောရဦးမယ်... အဲကောင်မနဲ့ နင်ပြောသလို ဇာတ်လမ်း လုပ်ရအောင်... ဘယ်မှာလဲ... ငါ့ အချိန်... မနက် ၈ နာရီ ငါ လာတယ် အလုပ်ကို တက်သုတ်ရိုက်ပြီး လုပ်ရတာ... နေ့လည် ၁၂ နာရီ ထိုးရင် နောက်တနေရာကိုသွား... နေ့လည် ၂ နာရီကျတော့ သည်ကို ပြန်လာ... လုပ်စရာရှိတာတွေ လုပ်...ညနေ ၅ နာရီဆို အိမ်ပြန်ရောက်နေပြီ... အဲကောင်မက မနက် ၉ နာရီမှ အလုပ်ဝင်တာ နောက်ထပ် ၉ နာရီ ပေါင်း ၁၈ နာရီ... ၁၈ - ၁၂ = ညနေ ၆ နာရီ.... ကဲ စဉ်းစားကြည့်လိုက်ဦး... သူ့ အလုပ်ချိန် ထဲမှာ သူက ဘယ်ကို သွားလို့ ရလို့လဲ... သူ့ အလုပ်ချိန်ပြီးတော့ ညနေ ၆ နာရီ ... ငါက အိမ်ပြန်ရောက်နေပြီ... နင် စွပ်စွဲသလို အဲကောင်မနဲ့ ငါက ဘယ်နားမှာ ဘယ်အချိန်မှာ သွားကျူနေရမလဲ... -
- နင်တို့ မျက်လုံးချင်း flirting လုပ်နေတာကြတော့ ဘာပြောမလဲ... ဟမ်... -
- အား... ငါ စိတ်တိုလာပြီ... -
- ငါ့ မျက်စေ့နဲ့ကို တပ်အပ်မြင်တာ... ဟဲ... လို... ... ဂွ...ဒ်... မောနင်း... အော်ဂတ်စတင်း... မျက်လုံးလေးကလည်း စင်းလို့... -
- အား.... -
- မောနင်း... ရီနေး... ဆိုတဲ့ နင့် အသံကလည်း ငါ မပြောလိုက်ချင်ဘူး... -
- ဒါက နင် သက်သက် စွပ်စွဲနေတာချည့်ကို... -
- ငါလည်း မျက်လုံးတွေကို ဖတ်တတ်ပါတယ်... နင်တို့ မျက်လုံးတွေကို ငါသိတာပေါ့... -
- မဟုတ်သေးဘူး... ဒါဟာ... နားလည်မှု လွဲတာ သက်သက်ပဲ... နင် နားလည်မှု လွဲနေတာ...-
- မလွဲဘူး... နင်တို့ မျက်လုံးတွေထဲက အဓိပ္ပါယ်တွေကို ငါက သိပ်ကို နားလည်တယ်... -
- ဟား... ခက်တော့ နေပြီ... -
- မခက်ဘူး... နင် ယောကျာ်း မဟုတ်လား... ၀န်ခံလိုက်... -
- အေး... ဟုတ်တယ်... ဟေ့... ရီနေးကို ငါ ယူမယ်... နင့်ကို ငါ ကွာမယ်... ဟုတ်ပြီလား... -
- ငါလည်း ကွာမယ်... -
- ကွာ ကွာ... -

+++++++++++++++++++++++++++++++++++++++++++++++++++++++++++++++++++++++++++++++++++

အပိုင်း (၂) အဆုံး

အစိပ်စိပ်အမွှာမွှာ အဆုတ်ဖြဲခံလိုက်ရသော စာရွက်တရွက်သည် လက်ထပ် စာချုပ် ဖြစ်လေသည်။ ဘုရားသခင့် ရှေ့မှာ ရေးထိုးထားသော လက်မှတ် ၂ခုသည် မည်သည့် အဓိပ္ပါယ်ကို ယခုအခါ ဆောင်ယူနေပါသနည်း။ စာရွက်များကို မယုံကြည်သော စိတ်သည် ယခုအခါ ပိုမိုနက်ရှိုင်းသွားသည်သာ အဖတ်တင်လေသည်။ စာအားဖြင့် ချုပ်နှောင်ခဲ့သည်များအား စာရွက် တရွက်အား ဆုတ်ဖြဲလိုက်ရုံမျှဖြင့် အားလုံး အဆုံးသပ်သွားလိမ့်လေမည်လား။ ဘုရားသခင်... ဖြေကြားပါ့... သို့မဟုတ်... ဆုတ်ဖြဲဖူးသူများ ဖြေကြားပါ့...။

(ဆက်လက်ဖော်ပြပါမည်)